WUF13 ilə bağlı media nümayəndələri üçün məlumatlandırma sessiyası keçirilib

Medianın İnkişafı Agentliyi, ADA Universiteti və WUF13 Azərbaycan Əməliyyat Şirkətinin birgə təşkilatçılığı ilə Ümumdünya Şəhərsalma Forumunun On Üçüncü sessiyası (WUF13) çərçivəsində media nümayəndələri üçün növbəti məlumatlandırma sessiyası keçirilib.

"Report"un məlumatına görə, açılış mərasimində çıxış edən Medianın İnkişafı Agentliyi İcraçı direktorunun müavini Natiq Məmmədli qeyd edib ki, WUF13 kimi beynəlxalq platformalar dayanıqlı şəhərsalma yanaşmalarının müzakirəsi və qabaqcıl təcrübələrin paylaşılması baxımından mühüm əhəmiyyət kəsb edir, bu baxımdan media nümayəndələrinin mövzunu detallı dəyərləndirməsi və düzgün kontekstdə ictimaiyyətə çatdırması xüsusi önəm daşıyır.

ADA Universitetinin Akademik işlər üzrə prorektorunun müşaviri, İxtisasartırma proqramlarının rəhbəri Aygün Hacıyeva isə ADA Universitetinin bu kimi mühüm beynəlxalq təşəbbüslərdə iştirakını ölkədə media maarifləndirilməsinə verilən töhfə kimi dəyərləndirib, universitetin müasir şəhərsalma və dayanıqlılıq mövzularına xüsusi önəm verdiyini bildirib. O, həmçinin geniş auditoriyalara milli və qlobal əhəmiyyətli mövzuların çatdırılmasında medianın rolunu diqqətə çatdırıb.

BMT-nin Məskunlaşma Proqramının (UN-Habitat) Kommunikasiya direktoru Katerina Bezqaçina çıxışında WUF13-ün Azərbaycanda keçirilməsinin media üçün unikal imkanlar yaratdığını vurğulayıb. O qeyd edib ki, bu tədbir jurnalistlərə qlobal səviyyəli ekspertlərlə birbaşa ünsiyyət qurmaq, beynəlxalq təcrübəni yaxından izləmək və şəhərsalma sahəsində ən aktual mövzuları yerində işıqlandırmaq imkanı təqdim edəcək.

Məlumatlandırma sessiyası çərçivəsində WUF13 Azərbaycan Əməliyyat Şirkətinin Substantiv məzmun şöbəsinin müdiri Cəmilə İsmayılzadə "WUF13 mövzuları, dialoqlar", Dövlət Şəhərsalma və Arxitektura Komitəsinin yanında Bakı Şəhər Memarlıq və Şəhərsalma Baş İdarəsinin Şəhərsalma və memarlıq şöbəsinin rəhbəri Çağrı Kərimzadə "Bakı şəhəri üzrə Baş Plan", WUF13 Azərbaycan Əməliyyat Şirkətinin İnklüziv tədbirlərin planlaşdırılması üzrə baş koordinatoru Səbinə Məmmədova və Müyəssərlik və inklüzivlik üzrə tədbir meneceri Leyla Səfərli "WUF13 tədbirində müyəssərlik və inklüzivlik", Rəqəmsal İnkişaf və Nəqliyyat Nazirliyinin Nəqliyyat siyasəti şöbəsinin aparıcı məsləhətçisi Nərgiz Gülmalıyeva isə "Yaşıl nəqliyyat, mikromobillik" mövzusunda çıxış ediblər.

Diqqətə çatdırılıb ki, WUF13 çərçivəsində müzakirə olunan mövzular müasir şəhərsalma yanaşmalarının əsas istiqamətlərini əhatə etməklə dayanıqlı və inklüziv şəhər mühitinin formalaşdırılması, şəhərlərin strateji planlaşdırılması, eləcə də ekoloji cəhətdən səmərəli nəqliyyat həllərinin tətbiqi kimi mühüm məsələləri bir araya gətirir. Sözügedən yanaşmaların kompleks şəkildə tətbiqi isə şəhər həyatının keyfiyyətinin yüksəldilməsinə və uzunmüddətli inkişafın təmin olunmasına xidmət edir.

Məlumatlandırma sessiyasının sonunda iştirakçıların sualları cavablandırılıb.

"AnewZ" "Somali - suverenlik uğrunda mübarizə" adlı filmi təqdim edib

"AnewZ" telekanalında kanalın ən uğurlu layihələrindən biri olan "Cəbhə xətti"nin davamı olan "Somali - suverenlik uğrunda mübarizə" adlı sənədli filmin premyerası olub.

"Far.Az" xəbər verir ki, yeni film onilliklər ərzində silahlı münaqişələrin, terrorun, hakimiyyət uğrunda mübarizənin və xarici oyunçuların maraqlarının kəsişdiyi Somalidəki vəziyyətə həsr olunub.

Afrika Buynuzunda, Qırmızı dəniz, Ədən körfəzi və Hind okeanı arasındakı əsas dəniz yollarının kəsişməsində yerləşən Somali dünyanın ən qeyri-sabit, eyni zamanda strateji cəhətdən ən vacib nöqtələrindən biri olaraq qalır.

Filmin müəllifi telekanalın sənədli layihələrinin aparıcı prodüseri Anastasiya Lavrina, rejissoru isə Bəhruz Qədirovdur. Çəkilişlər Somali üçün dönüş nöqtəsi olan dövrdə - ölkə tarixində "bir nəfər - bir səs" prinsipi ilə keçirilən ilk bələdiyyə seçkiləri zamanı, həmçinin İsrailin Somaliləndi tanımaq qərarından sonra aparılıb.

"Bu addım geniş beynəlxalq rezonansa səbəb oldu, çünki söhbət dünya birliyinin Somalinin bir hissəsi hesab etdiyi ərazidən gedir", - telekanal qeyd edir.

Filmin premyerası Azərbaycan və Somali arasında diplomatik münasibətlərin möhkəmləndiyi dövrə təsadüf edib. Somali Prezidenti Həsən Şeyx Mahmudun ötən il Bakıya səfəri və bu il ölkənin Azərbaycanda səfirliyinin açılması əməkdaşlığın inkişafında mühüm addımlar oldu.

Sənədli film artıq "AnewZ" telekanalının bütün rəqəmsal platformalarında mövcuddur.

İtv-nin baş direktoru vəzifəsinə sənəd qəbulu başlayıb

Audiovizual Şura İctimai Televiziya və Radio Yayımları Şirkətinin baş direktorunun səlahiyyət müddətinin bitməsi ilə əlaqədar olaraq bu vəzifəyə seçilmək üçün namizədlərin sənəd qəbulunu elan edir.

"Far.Az" xəbər verir ki, bu barədə Audiovizual Şura məlumat yayıb.

Bildirilib ki, İctimai Televiziya və Radio Yayımları Şirkətinin baş direktoru vəzifəsini tutmaq istəyən namizədlər sənədlərini 27 aprel 2026-cı il saat 9.00-dan 8 may 2026-cı il saat 18.00-dək Azərbaycan Respublikası Audiovizual Şurasına (ünvan: Bakı şəhəri, A.M. Şərifzadə küçəsi 315) təqdim etməlidirlər.

Namizədə dair tələblər:

Namizəd Azərbaycan Respublikasının vətəndaşı olmalıdır.

Namizəd ali təhsilli olmalıdır.

Əvvəllər ağır və ya xüsusilə ağır cinayətlərə, habelə ictimai mənəviyyat əleyhinə olan cinayətlərə görə məhkum edilmiş, həmçinin məhkumluğu ödənil­məmiş şəxs namizəd ola bilməz.

Fəaliyyət qabiliyyətsizliyi məhkəmə tərəfindən təsdiq olunmuş şəxs namizəd ola bilməz.

Təqdim olunmalı sənədlər:

Ərizə

Şəxsiyyət vəsiqəsinin surəti

Əmək kitabçasının surəti

Kadrların şəxsi uçot vərəqi (fotoşəkil ilə)

Ali təhsil haqqında sənədin (diplomun) notarial qaydada təsdiq olunmuş surəti

Qeyd olunan sənədlər 2 nüsxədə təqdim olunmalıdır.

Sənədlərin qəbulu üzrə məsul şəxs:

Kamran Əliyev (Hüquq və beynəlxalq əməkdaşlıq şöbəsinin məsləhətçisi)

Əlaqə vasitələri:

E-poçt: [email protected]

Telefon: (012) 434-81-07

Qeyd olunamlıdır ki, İctimai Televiziya və Radio Yayımları Şirkətinin baş direktorunu sənədlərini təqdim etmiş namizədlər arasından səsvermə yolu ilə İctimai Televiziya və Radio Yayımları Şirkətinin Yayım Şurası seçir.

Teleaparıcı İlham Tumas: Jurnalistika faktlar üzərində qurulduqda etibarlı dəyər qazanır

Jurnalistin əsas işi dəqiq məlumatı əks etdirməkdir.

"Far.Az" xəbər verir ki, bu sözləri teleaparıcı, ssenarist, rejissor, jurnalist İlham Tumas Far.Az Media Məktəbinin tələbələri ilə görüşü zamanı səsləndirib.

Jurnalistikanın mahiyyəti, informasiya dəqiqliyi və etik prinsiplər barədə danışan teleaparıcı bildirib ki, jurnalistin əsas vəzifəsi dəqiq və yoxlanılmış məlumatı ictimaiyyətə çatdırmaqdır. Onun sözlərinə görə, jurnalistika məhz faktlar üzərində qurulduqda etibarlı dəyər qazanır.

İ.Tumas qeyd edib ki, mənbələr və arxiv materialları ilə işləmək peşədə mühüm rol oynayır.

"Bu materiallardan istifadə edərkən media etikasına və qanunvericiliyin tələblərinə ciddi riayət olunmalıdır" – jurnalist bildirib.

O, həmçinin jurnalistin ictimai əhəmiyyətli məlumatla məxfi informasiyanı fərqləndirmə bacarığının vacibliyini və bunun peşəkarlığın əsas göstəricilərindən biri olduğunu vurğulayıb.

İlham Tumas 1972-ci ildə Sumqayıtda anadan olub. Bakı Dövlət Universitetinin fizika (1990–1992) və Sosial elmlər və psixologiya fakültəsində (1993–1996) təhsil alıb, ixtisasca filosofdur. Birinci Qarabağ müharibəsi veteranı, İkinci Qarabağ müharibəsi iştirakçısıdır.

Mətbuatda ilk yazısı 1992-ci ildə "Azərbaycan" qəzetində dərc olunub. "Avrasiya", "Kino", "Ayna", "Ekspress" kimi qəzetlərdə işləyib. Televiziyalarda sənədli filmlər müəllifidir. Bir sıra televiziya kanallarında çalışıb.

"Gizli tarix", "Dünyanın gizli ocağı: Vatikan", "Casusluq, kəşfiyyat, müharibə tarixindən", "Amansız qətllər", "Dünyanın gizli tarixi: İblislər və mələklər", "Gizli cinayətlər", "Prezidentə sui-qəsd", "Məbəd döyüşçüləri" kitablarının müəllifidir.

Hazırda İctimai TV-də yayımlanan "İstintaq davam edir" verilişinin aparıcıdır.

Medianın İnkişafı Agentliyində Monqolustan nümayəndə heyəti ilə görüş keçirilib

Medianın İnkişafı Agentliyində Monqolustandan olan media nümayəndələri ilə görüş keçirilib.

"Report" xəbər verir ki, görüşdə Medianın İnkişafı Agentliyinin İcraçı direktorunun müavini Natiq Məmmədli qonaqlara Agentliyin əsas fəaliyyət istiqamətləri, həyata keçirilən layihələr və qarşıya qoyulan prioritetlər barədə məlumat verib. O, jurnalistlərin peşəkar inkişafının dəstəklənməsi, media savadlılığının artırılması və müasir çağırışlara uyğun media mühitinin formalaşdırılması istiqamətində görülən işlərin əhəmiyyətini vurğulayıb.

Monqolustandan olan nümayəndə heyəti isə media subyektləri arasında təcrübə mübadiləsinin genişləndirilməsinin, tərəfdaşlıq əlaqələrinin təşviqi və birgə media layihələrinin həyata keçirilməsinin vacibliyini qeyd edib, bu məqsədlə qarşılıqlı səfərlərin və görüşlərin təşkili, həmçinin mediaturların keçirilməsinin əməkdaşlığın inkişafına töhfə verəcəyini bildirib.

Görüş zamanı informasiya mübadiləsinin gücləndirilməsi və digər aktual məsələlər ətrafında fikir mübadiləsi aparılıb.

Lənkəranda "Mediada Azərbaycan dili" mövzusunda təlim keçirilib

"Azərbaycan Televiziya və Radio Verilişləri" QSC-nin nəzdində fəaliyyət göstərən Teleradio Akademiyası "Mediada Azərbaycan dili" proqramı çərçivəsində növbəti təlim Lənkəranda keçirilib.

"Report"un Cənub bürosunun məlumatına görə, tədbirdə media qurumlarının nümayəndələri və dövlət strukturlarının mətbuat xidmətlərinin əməkdaşları iştirak ediblər.

"Mediada Azərbaycan dili" adlı videoçarxın nümayişindən sonra tədbirin məqsədi açıqlanıb. Qeyd edilib ki, əsas məqsəd medianın ana dilinin qorunmasındakı əhəmiyyətini vurğulamaq, bu istiqamətdə mövcud yanaşmaları və inkişaf imkanlarını müzakirə etmək, həmçinin mövcud problemləri üzə çıxarmaqdır.

Teleradio Akademiyasının direktoru Almaz Nəsibova çıxışında proqramın əsas hədəfinin Azərbaycan dilinin qorunması və inkişafı olduğunu vurğulayıb, layihə barədə məlumat verib və təlimlərin yekununda kitabın nəşr ediləcəyini diqqətə çatdırıb.

Düzgün və səlis nitqin yalnız media nümayəndələri üçün deyil, hər bir vətəndaş üçün vacib olduğunu vurğyulayan Əməkdar artist Sevda Ağazadə qeyd edib ki, fikirlərin ardıcıl və tələsmədən ifadə olunması dinləyici ilə ünsiyyətdə mühüm rol oynayır. Onun sözlərinə görə, insanın nitqi onun tanınmasında əsas amillərdən biridir. S.Ağazadə Azərbaycan Televiziyasının peşəkar məktəb kimi rolunu xüsusi qeyd edib və efirin yüksək məsuliyyət tələb etdiyini şəxsi təcrübəsi ilə əsaslandırıb.

Milli Elmlər Akademiyası (AMEA) Mərkəzi Elmi Kitabxanasının direktor müavini, dosent Şəhla Quliyeva Azərbaycan dilinə diqqətin artırılmasının vacibliyini qeyd edib və orfoqrafiyanın tarixi inkişafı haqqında məlumat verib. O, düzgün nitqin formalaşdırılmasının yazı mədəniyyətinin əsasını təşkil etdiyini bildirib.

Çıxışlarda həm televiziya, həm də yazılı mətbuatda dil qaydalarına riayət olunmasının vacibliyi diqqətə çatdırılıb. Dilin qorunmasının milli kimliyin qorunması ilə birbaşa bağlı olduğu qeyd edilib. Azərbaycan dilinin müxtəlif dövrlərdə xarici təsirlərə məruz qaldığı, bu gün dilin saflığının qorunmasının xüsusi əhəmiyyət daşıdığı vurğulayıb.

Efir estetikası üzrə mütəxəssis Mümtaz Xəlilzadə təlim çərçivəsində iştirakçılara ləhcə, şivə, rus və ingilis aksentləri probleminin həlli - Ahtikulyasiya, intonasiya, vurğu, üslub, mediada Azərbaycan dili mövzularında təqdimatla çıxış edib. İştirakçılarla maraqlı müzakirələr aparılıb.

Qeyd edək ki, ki, AzTV-nin Teleradio Akademiyasının "Mediada Azərbaycan dili" təlimləri bu ilin yanvar ayından başlayıb və iki ay ərzində paytaxt Bakıdakı televiziya, radio və onlayn media qurumlarında çalışan 50-yə yaxın jurnalist, redaktor və aparıcı iştirak edib. Bu təlimləri 20-dən çox dilçi alim və mütəxəss aparıb. Regionlardakı digər təlimlər də başa çatandan sonra əldə olunan bütün nəticələr elektron kitab şəklində çap olunacaq, iştirakçılara sertifikatlar veriləcək.

Qazaxıstanın mədəniyyət və informasiya nazirinin müavini "Report"un fəaliyyəti ilə tanış olub

Qazaxıstan Respublikasının mədəniyyət və informasiya nazirinin müavini Rüstəm Əlinin rəhbərlik etdiyi nümayəndə heyəti aprelin 9-da "Report" İnformasiya Agentliyində olub.

Nümayəndə heyətinin tərkibinə Qazaxıstan Xarici İşlər Nazirliyinin (XİN) Beynəlxalq İnformasiya Komitəsinin sədri Erlan Jetibayev və Qazaxıstanın Bakıdakı səfirliyinin attaşesi Temirlan Baxıtjan daxil olub.

"Report"un direktoru Fuad Hüseynəliyev görüşdə informasiya agentliyinin fəaliyyəti barədə ətraflı məlumat verib. O qeyd edib ki, "Global Media Group" şirkətlər qrupunun tərkibinə daxil olan "Report" öz işində məlumatın dəqiq çatdırılması prinsipini rəhbər tutur və bunun sayəsində bu gün Azərbaycanda ən çox istinad edilən media qurumudur. Agentliyin direktoru, həmçinin holdinqin strukturuna daxil olan şirkətlər barədə də danışıb.

Bu kontekstdə F.Hüseynəliyev vurğulayıb ki, "Global Media Group"un strukturuna daxil olan "Report" və "Baku TV" telekanalı ötən ilin payızında Qazaxıstanın ən böyük media resurslarından biri - "Xabar" Agentliyi ilə əməkdaşlıq haqqında memorandum imzalayıb.

Nazir müavini Rüstəm Əli isə öz növbəsində Qazaxıstan nümayəndə heyətinin Azərbaycana səfərinin əsas məqsədlərindən, Bakıda keçirilən görüşlərdən bəhs edib, ölkələr arasında media sahəsində fəal əməkdaşlığın qurulduğunu məmnunluqla qeyd edib. Bununla yanaşı, o vurğulayıb ki, ölkələrimizin bu sahədə qarşılıqlı əlaqələri genişləndirmək üçün potensialı var.

"Təşəbbüslərə gəldikdə isə bu il kütləvi informasiya sahəsində fəal işlə yanaşı, rəqəmsallaşma üzrə də xeyli sayda layihə həyata keçirilir. Qazaxıstan Prezidenti Kasım-Jomart Tokayev bu istiqamətə, o cümlədən süni intellekt texnologiyalarının bütün sahələrdə tətbiqinə xüsusi diqqət yetirir. Bununla əlaqədar olaraq, biz də əməkdaşlığın inkişafında və müvafiq təşəbbüslərin təşviqində maraqlıyıq. Hesab edirik ki, bu istiqamətdə yol xəritəsinin işlənib hazırlanması zəruridir", - o bildirib.

Rüstəm Əli vurğulayıb ki, Prezident Kasım-Jomart Tokayevin fərmanı ilə 2026-cı il Qazaxıstanda "Rəqəmsallaşma və süni intellekt ili" elan edilib. Nazir müavininin sözlərinə görə, Prezident K.Tokayev Qazaxıstan xalqına müraciətində qeyd edib ki, ölkə qarşısında üç il ərzində tam rəqəmsal ölkəyə çevrilmək vəzifəsi qoyulub. Süni intellektin tətbiqi əmək məhsuldarlığının artmasına, ixracyönümlü sektorların formalaşmasına və Qazaxıstanın rəqəmsal iqtisadiyyatın qlobal zəncirlərinə inteqrasiyasına töhfə verərək iqtisadi inkişafın əsas halqasına çevrilməlidir.

O, həmçinin qeyd edib ki, Qazaxıstanda süni intellekt sahəsində layihələr həyata keçirən uğurlu şirkətlər mövcuddur. Əlavə edib ki, bu şirkətlər Türk Dövlətləri Təşkilatı ölkələrində də fəaliyyət göstərir.

Qazaxıstan XİN-in nümayəndəsi Erlan Jetibayev isə öz növbəsində vurğulayıb ki, xarici siyasət idarəsi ölkədə akkreditə olunmuş xarici müxbirlərlə işə xüsusi diqqət yetirir. Onun sözlərinə görə, XİN və Qazaxıstanın digər dövlət orqanları xarici ölkələrdən olan jurnalistlərin sorğularına operativ cavab verməyə çalışır ki, bu da ölkə haqqında obyektiv informasiyanın yayılmasına şərait yaradır.

Görüşdə "Report"un baş redaktoru Namiq Mayılov süni intellektdən xəbər istehsalı aləti kimi deyil, jurnalistlərin işini dəstəkləməyə və asanlaşdırmağa xidmət edən köməkçi vasitə kimi istifadə olunmasının zəruriliyini vurğulayıb.

Müzakirələr zamanı, həmçinin ölkələr arasında mədəniyyətlərarası qarşılıqlı əlaqənin əhəmiyyəti mövzusuna toxunulub, Azərbaycan və Qazaxıstandakı gənclərin ölkələrin mədəniyyətinə və tarixi irsinə qarşılıqlı marağı vurğulanıb.

Baş redaktorun müavini Anar Əzizov xatırladıb ki, Bakının mərkəzində, Dənizkənarı Bulvarda 2026-cı ilin mart ayında Qazaxıstan səfirliyi tərəfindən Novruz bayramına həsr olunan, sakinlərin və şəhər qonaqlarının böyük marağına, eləcə də fəal iştirakına səbəb olan kütləvi mədəni tədbir təşkil edilib.

Bundan əlavə, tərəflər iki ölkə arasında formalaşmış dostluq və etimad səviyyəsini yüksək qiymətləndirib, həm siyasi, həm də iqtisadi sahələrdə onların dayanıqlı və ardıcıl xarakterini vurğulayıblar. Görüş iştirakçıları ikitərəfli əməkdaşlığın qarşılıqlı hörmət, bərabərhüquqluluq və bir-birinin maraqlarının nəzərə alınması prinsiplərinə əsaslandığını qeyd eediblər.

F.Hüseynəliyev görüşdə həmçinin Aktau şəhəri yaxınlığında "Azərbaycan Hava Yolları"na (AZAL) məxsus təyyarənin qəzaya uğraması ilə əlaqədar Qazaxıstan tərəfinə göstərdikləri həmrəylik və dəstəyə görə minnətdarlığını bildirib. Agentliyin direktoru Qazaxıstan vətəndaşlarının, eləcə də müxtəlif qurumlarının xilasetmə əməliyyatının həyata keçirilməsində və bu faciəvi hadisənin obyektiv, şəffaf şəkildə araşdırılmasının təmin edilməsindəki göstərdikləri köməyi diqqətə çatdırıb.

Görüşün sonunda Qazaxıstan nümayəndə heyəti redaksiyada yaradılmış şərait və agentliyin fəaliyyəti ilə tanış olub.

"Baku TV" "YouTube" reytinqlərində liderdir

Azərbaycan telekanallarının 2026-cı ilin mart ayı üzrə "YouTube" baxış reytinqi açıqlanıb.

"Report" xəbər verir ki, hesabat dövründə "Baku TV" ümumi 176 milyon 144 073 baxış sayı ilə rəqiblərini geridə qoyaraq birinci yerdə qərarlaşıb.

İki dildə fəaliyyət göstərən media qurumunun Azərbaycandilli kanalı 77 milyon 437 926, rusdilli kanalı isə 98 milyon 706 147 baxış toplayaraq bu uğura böyük töhfə verib.

Qısa müddət ərzində dinamik inkişaf yolu keçən "Baku TV" operativ xəbər istehsalı, eksklüziv reportajları və analitik məzmunu ilə Azərbaycanın ən təsirli media platformalarından birinə çevrilib.

Rəqəmsal platformalarda qazanılan uğurlar bununla bitmir; belə ki, mart ayının əvvəlində "Baku TV"nin rəsmi Azərbaycandilli kanalı 2 milyardlıq baxış həddini ötərək tarixi bir nəticəyə imza atmışdı.

"Global Media Group"un tərkibində fəaliyyət göstərən "Baku TV"ni sosial media platformaları ilə yanaşı, Azərbaycandakı bütün TV provayderlər (kabel yayımı) və "Azerspace-1" peyki vasitəsilə Avropa və Asiyada da canlı izləmək mümkündür.

Azərbaycan-Türkiyə Birgə Media Platformasının Birgə İşçi Komissiyası yaradılacaq - YENİLƏNİB

"Stratcom Summit 26" çərçivəsində Azərbaycanın Medianın İnkişafı Agentliyinin (MEDİA) İcraçı direktoru Əhməd İsmayılov ilə Türkiyə Prezidenti Administrasiyasının İctimaiyyətlə Əlaqələr Departamentinin rəhbəri Burhanettin Duran arasında ikitərəfli görüş keçirilib.

Agentlikdən "Far.Az"a verilən məlumata görə, görüş zamanı Azərbaycan ilə Türkiyə arasında media sahəsində mövcud strateji tərəfdaşlıq münasibətlərinin daha da genişləndirilməsi, xüsusilə dezinformasiya ilə mübarizə istiqamətində birgə fəaliyyətin gücləndirilməsi məsələləri müzakirə olunub.

Vurğulanıb ki, qlobal informasiya məkanında baş verən transformasiyalar, eləcə də saxta və manipulyativ məzmunların artan təsiri dövlət qurumları arasında daha sıx koordinasiya və sistemli əməkdaşlığı zəruri edir.

Görüşün sonunda "Azərbaycan Respublikasının Medianın İnkişafı Agentliyi ilə Türkiyə Prezidenti Administrasiyasının İctimaiyyətlə Əlaqələr Departamenti arasında Azərbaycan – Türkiyə Birgə Media Platformasının Birgə İşçi Komissiyasının və Komitələrinin yaradılması haqqında Anlaşma Memorandumu" imzalanıb.

Sənəd tərəflər arasında institusional əməkdaşlığın daha da dərinləşdirilməsini, birgə fəaliyyət mexanizmlərinin təkmilləşdirilməsini və koordinasiyanın gücləndirilməsini nəzərdə tutur.

04:02

İstanbulda Türkiyə ilə Azərbaycan arasında media və kommunikasiya sahəsində əməkdaşlığın daha da dərinləşdirilməsi müzakirə edilib.

"Far.Az" xəbər verir ki, bunu Türkiyə Prezident Aparatının Kommunikasiya rəhbəri Burhanəddin Duran "X"dəki hesabında yazıb.

"Türkiyənin İstanbul şəhərində Beşinci Beynəlxalq Strateji Kommunikasiya Sammiti – "Stratcom Summit 26" çərçivəsində Azərbaycanın Media İnkişafı Agentliyinin rəhbəri Əhməd İsmayılovla bir araya gəlməkdən məmnun oldum.

Görüşümüz zamanı Türkiyə ilə qardaş ölkə Can Azərbaycan arasında media və kommunikasiya sahəsində əməkdaşlığın daha da dərinləşdirilməsi, birgə layihələrin hazırlanması və strateji kommunikasiya sahəsində koordinasiyanın artırılması məsələlərini müzakirə etdik.

Prezidentimizin rəhbərliyi altında davam edən güclü Türkiyə-Azərbaycan münasibətlərinin kommunikasiya sahəsində də institusional və davamlı təmələ çevrilməsinə böyük əhəmiyyət veririk.

"Bir millət, iki dövlət" prinsipi ilə əməkdaşlığımızı daha da gücləndirərək birgə səylərimizi qətiyyətlə davam etdirəcəyik", - B.Duran qeyd edib.

Türkiyə ilə Azərbaycan arasında media və kommunikasiyada əməkdaşlığın dərinləşdirilməsi müzakirə edilib

İstanbulda Türkiyə ilə Azərbaycan arasında media və kommunikasiya sahəsində əməkdaşlığın daha da dərinləşdirilməsi müzakirə edilib.

"Far.Az" xəbər verir ki, bunu Türkiyə Prezident Aparatının Kommunikasiya rəhbəri Burhanəddin Duran "X"dəki hesabında yazıb.

"Türkiyənin İstanbul şəhərində Beşinci Beynəlxalq Strateji Kommunikasiya Sammiti – "Stratcom Summit 26" çərçivəsində Azərbaycanın Media İnkişafı Agentliyinin rəhbəri Əhməd İsmayılovla bir araya gəlməkdən məmnun oldum.

Görüşümüz zamanı Türkiyə ilə qardaş ölkə Can Azərbaycan arasında media və kommunikasiya sahəsində əməkdaşlığın daha da dərinləşdirilməsi, birgə layihələrin hazırlanması və strateji kommunikasiya sahəsində koordinasiyanın artırılması məsələlərini müzakirə etdik.

Prezidentimizin rəhbərliyi altında davam edən güclü Türkiyə-Azərbaycan münasibətlərinin kommunikasiya sahəsində də institusional və davamlı təmələ çevrilməsinə böyük əhəmiyyət veririk.

"Bir millət, iki dövlət" prinsipi ilə əməkdaşlığımızı daha da gücləndirərək birgə səylərimizi qətiyyətlə davam etdirəcəyik", - B.Duran qeyd edib.

Burhanəddin Duran: Azərbaycanla bir sıra sahələrdə kommunikasiya körpüsü qurmağı hədəf seçmişik

Türkiyə qardaş Azərbaycanla bir sıra sahələrdə kommunikasiya körpüsü qurmağı hədəf seçib.

"Report" xəbər verir ki, bunu Türkiyə Prezident Aparatının Kommunikasiya rəhbəri Burhanəddin Duran "X"dəki hesabında yazıb.

"Türkiyə Prezidenti Administrasiyasının İctimaiyyətlə Əlaqələr Departamentinin təşkilatçılığı ilə təşkil edilən Beşinci Beynəlxalq Strateji Kommunikasiya Sammiti – "Stratcom Summit 26"ndə Azərbaycan–Türkiyə Birgə Media Platforması çərçivəsində Birgə İşçi Komissiyalarının və Komitələrinin yaradılması ilə bağlı Azərbaycan Respublikası Media İnkişafı Agentliyinin rəhbəri cənab Əhməd İsmayılovla Anlaşma Memorandumu imzaladıq.

Bu addımla, Prezidentimiz cənab Rəcəb Tayyib Ərdoğanın rəhbərliyi altında, dost və qardaş ölkə Azərbaycanla rəqəmsal və sosial media, audiovizual media, strateji kommunikasiya və böhran vəziyyətlərində məlumat, təcrübə və texnologiya paylaşımını artırmaqla qurumlarımız arasında daha güclü kommunikasiya körpüsü qurmağı hədəfləyirik.

İnanırıq ki, Türkiyə-Azərbaycan Birgə Media Platforması çərçivəsində Birgə İşçi Komissiyalarının və daimi komitələrin yaradılmasını nəzərdə tutan anlaşma memorandumunun həyata keçirilməsi media və kommunikasiya sahəsindəki əməkdaşlığımızı daha da dərinləşdirəcək. Bunun faydalı olmasını arzulayırıq", - B.Duran qeyd edib.

İcraçı direktor: Azərbaycan-Türkiyə Birgə Media Platforması daha geniş şəkildə inkişaf etdiriləcək

Azərbaycan–Türkiyə Birgə Media Platforması iki ölkə mediasının əlaqəli və səmərəli fəaliyyət göstərməsini nəzərdə tutan platforma çərçivəsində müvafiq işlər görür.

Medianın İnkişafı Agentliyindən "Far.Az"a verilən məlumata görə, bunu qurumun icraçı direktoru Əhməd İsmayılov İstanbulda keçirilən Strateji Kommunikasiya Sammitindəki çıxışı zamanı deyib.

Beynəlxalq əməkdaşlığa toxunan Əhməd İsmayılov qeyd edib ki, Medianın İnkişafı Agentliyi və bir sıra xarici ölkələrin aidiyyəti qurumları arasında əməkdaşlığa dair ikitərəfli sənədlər mövcuddur:

"Bu sənədlər çərçivəsində milli maraqların birgə təşviqi və qorunmasına yönəlmiş ikitərəfli əməkdaşlıq mexanizmlərinin formalaşdırılması, media sahəsində qarşılıqlı əlaqələrin inkişaf etdirilməsi, birgə layihələrin həyata keçirilməsi və təcrübə mübadiləsinin genişləndirilməsi nəzərdə tutulur. Bu əməkdaşlıqlar çərçivəsində Azərbaycan–Türkiyə Birgə Media Platformasını xüsusi vurğulamaq istərdik. İki ölkənin mediasının əlaqəli şəkildə, səmərəli fəaliyyət göstərməsini nəzərdə tutan Platforma çərçivəsində müvafiq işlər görülmüş, bu prosesin qarşıdakı dövrdə daha geniş şəkildə inkişaf etdirilməsi planlaşdırılır".

Ə.İsmayılov hər il keçirilən Şuşa Qlobal Media Forumuna toxunaraq qeyd edib ki, bu forum Prezident İlham Əliyevin iştirakı ilə keçirilir və qlobal media trendlərinin təhlili, beynəlxalq əməkdaşlığın genişləndirilməsi, innovativ imkanların araşdırılması və qlobal təhlükəsizlik üçün xüsusi əhəmiyyət daşıyan bir çox məsələlər ətrafında müzakirələrin aparılması, konstruktiv dialoqların və təcrübə mübadiləsinin təşviqi məqsədilə dünyanın müxtəlif ölkələrindən olan rəsmilər, media və vətəndaş cəmiyyəti, dövlət və biznes nümayəndələri, beynəlxalq təşkilatların medianın inkişafı üzrə təmsilçiləri, o cümlədən dünyaca məşhur media simaları üçün mühüm platforma rolunu oynayır:

"Onu da qeyd etmək istərdik ki, türk dünyasında çoxtərəfli əməkdaşlıq çərçivəsində prioritet istiqamətlərdən biri kimi informasiya təhlükəsizliyi məsələsi xüsusi əhəmiyyət kəsb edir, bu sahədə əlaqələndirilmiş fəaliyyətin gücləndirilməsi isə ümumi informasiya məkanının dayanıqlılığının və etibarlılığının təmin olunmasına mühüm töhfə verir".