Qəbələdə güclü külək və dolu bir sıra fəsadlara səbəb olub

Ötən gün Qəbələdə güclü külək və dolu bir sıra fəsadlara səbəb olub.

BAKU.WS xəbər verir ki, sosial şəbəkələrdə yayılan görüntülərdə təbiət hadisəsinin yaratdığı ziyanın miqyası əks olunub.

Bildirilir ki, hadisə nəticəsində xəsarət alan şəxs də var.

Посмотреть эту публикацию в Instagram

Публикация от @baku.ws_official

Bakı metrosuna yüz milyon dollarlıq vəsait ayrıldı

"Bakı metrosunun genişləndirilməsi layihəsi - I mərhələ" çərçivəsində 180 milyon ABŞ dolları məbləğində maliyyələşmə müqaviləsi imzalanıb. İnvestisiyaların təmin edilməsi sahəsində beynəlxalq məsləhətçi şirkət cəlb olunub və investisiya mühitinin cazibədarlığının yüksəldilməsi naminə 10 prioritet istiqamət üzrə xüsusi proqram işlənib hazırlanıb".

BAKU.WS Xezerxeber.az-a istinadən xəbər verir ki, bunu "AZCON Holding"in icraçı direktoru Şahib Babayev bildirib.

Bu maliyyələşməyə nələr aiddir? Hansı işlər görülə bilər?

"Bakı Metropoliteni" QSC-nin mətbuat xidməti və ictimaiyyətlə əlaqələr şöbəsinin rəhbəri Bəxtiyar Məmmədovun sözlərinə görə, metro şəbəkəsinin genişləndirilməsi çoxşaxəli prosesdir və bir sıra mürəkkəb layihələrin həyata keçirilməsi də nəzərdə tutulur.

Daha ətraflı videomaterialda:

XƏBƏRDARLIQ: Bakıya və Abşeron yarımadasına dolu yağması ehtimalı var

Bakıda və Abşeron yarımadasının bəzi şəhərərtafı ərazilərində dolu prosesinin olacağı ehtimalı var.

Far.Az xəbər verir ki, bu barədə Milli Hidrometeorologiya Xidmətinin mayın 29-u saat 22:50-yə olan məlumatında qeyd olunub.

Daha əvvəl ölkə ərazisində yağıntılı və küləkli hava şəraitinin davam etdiyi, bəzi yerlərdə yağıntıların intensiv və güclü olduğu bildirilmişdi.

Bu yola iri ağac aşıb - Yol polisindən XƏBƏRDARLIQ

Baş Dövlət Yol Polisi İdarəsi (BDYPİ) müşahidə olunan hava şərait ilə bağlı sürücülərə bir daha müraciət edib.

BAKU.WS xəbər verir ki, müraciətdə Qaraməryəm-İsmayıllı-Şəki avtomobil yolunun 60-cı kilometrində küləyin təsirindən iri gövdəli ağac yolun hərəkət hissəsinə aşdığı bildirilib.

Qeyd olunub ki, əraziyə cəlb olunan YPX Alayının əməkdaşları tərəfindən zəruri təhlükəsizlik tədbirlər görülür, hərəkətin nizamlanması təmin edilir.

"Baş Dövlət Yol Polisi İdarəsi hazırda küləklə müşayiət olunan yağışlı hava şəraitini nəzərə alaraq sürücülərdən ehtiyatlı olmağı, nasaz avtomobillərlə yola çıxmamağı, ara məsafəsini normadan artıq saxlamağı, ötmə, manevr etmə qaydalarına əməl etməyi tövsiyə edir", - müraciətdə bildirilib.

İnsanların axın etdiyi müqəddəs məkanın sirri: "Bu su üstlərinə düşsə..."

Naxçıvanda yerləşən Əshabi-Kəhf ziyarətgahında, xüsusilə Qurban bayramında böyük izdiham müşahidə olunur.

Baku TV-nin məlumatına görə, ziyarətçilər qurbanlarını kompleksin aşağı hissəsindəki xüsusi məntəqədə kəsdikdən sonra ziyarətgahın yuxarı hissəsinə qalxaraq ibadətlərini yerinə yetirirlər.

Əshabi-Kəhf əsrlər boyu insanların inanc və ziyarət məkanı olub. Onun tarixinin çox qədim dövrlərə aid olduğu bildirilir.

Tarixçi Asəf Orucov bildirib ki, Əshabi-Kəhfdə qədim türk inanc sistemlərinin izlərinə də rast gəlmək mümkündür. Burada ağac, daş və su kultları ilə bağlı inanclar mövcuddur.

"İnanca görə, burada tavandan daman suyun insanın üzərinə düşməsi niyyət və arzularının qəbul olunacağına işarə sayılır. Sovet hakimiyyəti illərində Əshabi-Kəhfin ziyarət edilməsinə icazə verilmirdi. Buna baxmayaraq, insanlar gizli şəkildə, hətta gecə saatlarında belə buraya ziyarətə gəlirdilər", - deyə o, sözlərinə əlavə edib.

Küləkli hava sağlamlığa necə təsir edir? - Bunları bilməlisiniz

Güclü və davamlı külək təkcə gündəlik həyatı deyil, insan sağlamlığını da mənfi təsir altına ala bilər. Mütəxəssislər bildirirlər ki, xüsusilə tozlu və soyuq küləklər bəzi xəstəliklərin şiddətlənməsinə səbəb olur.

Far.Az xəbər verir ki, həkimlərin sözlərinə görə, küləkli havalarda ən çox müşahidə olunan problemlərdən biri baş ağrısı və miqrendir.

Atmosfer təzyiqindəki dəyişikliklər həssas insanlarda halsızlıq və başgicəllənmə yarada bilər.

Bundan əlavə, külək havadakı toz, polen və digər allergenləri yaydığı üçün allergiya və astma xəstələri üçün risk artır. Bu zaman nəfəs darlığı, öskürək və gözlərdə qıcıqlanma halları müşahidə oluna bilər.

Mütəxəssislər qeyd edirlər ki, güclü külək dərinin qurumasına, gözlərdə yanma hissinə və immun sisteminin zəifləməsinə də səbəb ola bilər. Uzun müddət soyuq külək altında qalmaq isə orqanizmin müqavimətini azaldaraq soyuqdəymə riskini artırır.

Həkimlər küləkli havalarda xüsusilə uşaqlara, yaşlılara və xroniki xəstəliyi olan insanlara diqqətli olmağı tövsiyə edirlər. Belə günlərdə açıq havada uzun müddət qalmamaq, qoruyucu eynəkdən istifadə etmək və orqanizmi susuz qoymamaq məsləhət görülür.

Su-kanalizasiya işləri apardılar, asfalt qatını təmir etməyi unutdular

Yolun asfalt örtüyü su-kanalizasiya işləri aparılarkən dağıdılıb... Layihə başa çatdıqdan sonra isə yenidən asfaltlanmayıb...

Far.Az Xezerxeber.az-a istinadən xəbər verir ki, görüntülər Gəncə şəhərinin Aşıq Ələsgər küçəsindəndir.

Sakinlərin sözlərinə görə, layihə çərçivəsində nəzərdə tutulan işlər başa çatdıqdan sonra yolun asfalt örtüyünün bərpa olunmaması onları ciddi çətinliklərlə üz-üzə qoyub.

Xüsusilə yağışlı havalarda küçə ilə axan sel və yağış suları yolu keçilməz vəziyyətə salır, hərəkəti çətinləşdirir.

Məsələ ilə əlaqədar Gəncə Şəhər İcra Hakimiyyətindən bildirildi ki, şəhərdə həyata keçirilən genişmiqyaslı abadlıq-quruculuq işləri çərçivəsində Aşıq Ələsgər küçəsinin bir hissəsi AYNA-nın sifarişi ilə Avtomobil Yolları Dövlət Agentliyi tərəfindən asfaltlanib. Digər hissəsinin isə şəhərdə görülən abadlıq işləri çərçivəsində növbəti mərhələdə asfaltlanması nəzərdə tutulur.

Xezerxeber.az mövzu ilə bağlı daha ətraflı videomaterialı təqdim edir.

Şimal-qərb bölgəsində leysan yağışları olub, dolu düşüb

Şimal-qərb bölgəsində leysan yağışları olub, Qax və Şəkinin bəzi ərazilərinə dolu düşüb.

BAKU.WS apa-ya istinadən xəbər verir ki, günün ikinci yarısı saat 16:30-dan başlayaraq ölkənin Şimal-qərb bölgəsinin Balakən rayonu istiqamətindən ölkə ərazisinə qeyri-sabit hava şəraiti daxil olub. Hava şəraitinin kəskin dəyişməsi səbəbilə bölgənin Balakən, Zaqatala, Qax və Şəki rayonları ərazisində leysan xarakterli yağış müşahidə olunub.

Bölgənin dağ çaylarında suyun səviyyəsində artım müşahidə olunub. Qax rayonunun Ağçay, İlisu və Sarıbaş kəndlərinin ərazilərinə və Şəki rayon mərkəzinin yuxarı hissəsinə dolu düşüb. Qaxın Ağçay kəndinin daxilindən axan çaydan qısamüddətli sel keçib. Bölgədə qeyr-sabit hava şəraiti davam edir.

Qəbələdə də küləklə müşayiət olunan güclü leysan və dolu düşərək fəsadlar yaradıb. Ani başlayan yağış küçələrdə keçilməz suyun yaranmasına səbəb olub, eləcə də dolu nəticəsində təsərrüfatlara ciddi ziyan dəyib.

Dolu dənəciklərinin böyük olması həm ağaclara həmdə avtomobillərə ciddi ziyan vurub. Qeyri sabit hava şəraiti hələdə davam edir.

Qalereya

Abituriyentlər ilk imtahanın nəticəsi açıqlanmadan, ikinci cəhd üçün niyə qeydiyyatdan keçməlidir?

Bir çox namizəd, ilk imtahanın nəticəsinin onu qane edib-etməyəcəyini bilmədən, ikinci dəfə iştirak etmək üçün ödəniş edərək qeydiyyatdan keçmək məcburiyyətində qalır.

Bu isə öz növbəsində həm maliyyə, həm də psixoloji cəhətdən gərginlik yaradan amil hesab olunur.

BAKU.WS xəbər verir ki, bu fikirləri "Xəzər Xəbər"ə açıqlamasında təhsil məsələləri üzrə ekspert, Vüsət Əzizov bildirib.

Ekspertin sözlərinə görə bu hal birinci cəhd imtahanında yüksək nəticə toplaya bilməyən abituriyentlər üçün bir sıra çətinliklər yaradır.

Onun fikrincə, bu məsələdə valideynlərin və abituriyentlərin istəklərinin nəzərə alınması daha məqsədəuyğun hesab olunur.

Ekspert qeyd edib ki, imtahan tarixləri Nazirlər Kabineti tərəfindən müxtəlif dövlət qurumları ilə razılaşdırılaraq müəyyənləşdirilir.

Daha ətraflı videomaterialda:

Minimum maaş ən azı 660 manat olmalıdır - DEPUTAT

Azərbaycanda maaşların həftəlik ödənilməsi modelinin tətbiqi məsələsi vaxtaşırı müzakirə olunsa da, ekspertlər hesab edir ki, hazırkı mərhələdə əsas problem ödənişin tezliyi deyil, əməkhaqqının real yaşayış xərclərinə uyğun olmamasıdır. Beynəlxalq praktikada həftəlik maaş sistemi müəyyən sahələrdə uğurla tətbiq edilsə də, bu modelin həm üstünlükləri, həm də çatışmazlıqları mövcuddur.

BAKU.WS xəbər verir ki, məsələ ilə bağlı Modern.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Əli Məsimlibildirib ki, fəaliyyət sahəsindən və digər amillərdən asılı olaraq, bir sıra ölkələrdə əməkhaqqı həftəlik, ayda iki dəfə və ya aylıq şəkildə ödənilir.

Deputat qeyd edib ki, həftəlik əməkhaqqı sistemi xüsusilə ABŞ, Böyük Britaniya və Kanada kimi ölkələrdə geniş yayılıb:

"ABŞ-da özəl şirkətlərin 30 faizə yaxını həftədə bir dəfə ödəniş formasından istifadə edir. Bu sistem tikinti, pərakəndə ticarət və xidmət sektorunda daha çox tətbiq olunur. İşçilər qazandıqları vəsaiti daha tez əldə etdikləri üçün gündəlik xərclərini idarə etmək onlar üçün asanlaşır".

Əli Məsimli vurğulayıb ki, həftəlik maaş sistemi xüsusilə aşağı gəlirli ailələr üçün müəyyən üstünlüklər yaratsa da, impulsiv xərcləmə riskini də artırır:

"Kirayə, ipoteka və sığorta kimi aylıq ödənişlər zamanı problemlər yarana bilər. Bundan əlavə, hər həftə əməkhaqqının hesablanması əlavə mühasibat və inzibati yük formalaşdırır".

Deputatın sözlərinə görə, Azərbaycanda əhalini daha çox maraqlandıran məsələ maaşın hansı formada verilməsi deyil, onun dolanışığa yetib-yetməməsidir:

"Hazırda minimum əməkhaqqı 400 manatdır və bu məbləğ vətəndaşların minimum tələbatını tam qarşılamaq üçün kifayət etmir. Azərbaycanın qoşulduğu Avropa Sosial Xartiyasına əsasən minimum əməkhaqqı orta maaşın 60 faizindən aşağı olmamalıdır. Bu yanaşma ilə hesabladıqda minimum əməkhaqqı 660 manatdan yuxarı olmalıdır".

O əlavə edib ki, minimum əməkhaqqı ilə yanaşı median əməkhaqqının artırılması da vacibdir:

"Ölkə üzrə orta aylıq əməkhaqqı 1152 manat olsa da, median maaş bundan xeyli aşağıdır. Median gəlir insanların real sosial vəziyyətini daha düzgün əks etdirir. Ona görə də həm minimum, həm də median əməkhaqqının artırılması istiqamətində təsirli addımlar atılmalıdır".

Əli Məsimli sonda bildirib ki, Azərbaycanda saatlıq əməkhaqqı sisteminə keçidlə bağlı da işlər aparılır və gələcəkdə minimum saatlıq əməkhaqqının tətbiqi ilə bağlı qanunvericiliyə dəyişikliklər edilə bilər.

Xankəndidə istehsal gücü illik 25 milyon cüt iş əlcəyi olan müəssisə fəaliyyətə başlayıb

Xankəndidə istehsal gücü illik 25 milyon cüt iş əlcəyi olan müəssisə fəaliyyətə başlayıb, məhsullar sənaye və təsərrüfatda istifadə olunacaq.

BAKU.WS report-a istinadən xəbər verir ki, istehsalat müəssisəsində yerli sakinlər işlə təmin edilib.

Onlardan biri də Xankəndi şəhər sakini olan Xəyalə Babayevadır. Müsahibimiz Xankəndidə fəaliyyət göstərən "GP Safety" MMC-nin əlcək istehsalı müəssisəsində işlə təmin olunub.

"Artıq bir ildir ki, doğma ocağımıza Xankəndiyə köçmüşük. Köçdən sonra ailəmizin əmək fəaliyyəti ilə maraqlandılar və bizə Xankəndidə fəaliyyət göstərən müəssisələrdə iş təklif etdilər. Ancaq mən və yoldaşım əlcək istehsalı sexində işləməyə üstünlük verdik. Artıq burada daimi işləyirik".

Müəssisədə istehsal ediləcək əlcəklər 4 növdə olmaqla müxtəlif təyinatlar üçün nəzərdə tutulub. Məhsullar əsasən daxili bazar üçün nəzərdə tutulub. Müəssisənin illik istehsal gücü 25 milyon cüt əlcəkdir. Yeni fəaliyyətə başlayan müəssisədə ilkin mərhələdə 35 nəfər işlə təmin olunacaq ki, bunlar da əsasən doğma ocağına qayıdan keçmiş məcburi köçkünlər olacaq.

Elxan Babayev də doğma yurduna köçəndən sonra tez bir zamanda işlə təmin olunmasından söz açıb:

"Açığı, Xankəndiyə dönəndən sonra işlə təminatımızın bir az zaman alacağını düşünürdüm. Amma bunun tam əksini yaşadıq. Həyat yoldaşımla birgə işlə təmin edildik. Əlbəttə, uzaq yol qət etmədən birbaşa iş yerinə gəlmək və doğma yurdumuzun quruculuğunda iştirak etmək olduqca qürurludur".

Müəssisənin investisiya həcmi 3,5 milyon manatdır. Onun yaradılmasına dövlət dəstəyi də göstərilib. Belə ki, İqtisadiyyat Nazirliyinin tabeliyində Azərbaycan Biznesinin İnkişafı Fondu tərəfindən 1 milyon manat güzəştli kredit ayrılıb. Bundan başqa, investisiya təşviqi sənədi əsasında idxal olunan texnika və avadanlıqlar üzrə 238 min manat ƏDV-dən azadolma tətbiq edilib.

Qeyd edək ki, bu müəssisənin yaradılması yerli əhalinin işlə təmin olunmasına şərait yaradır, həm daxili bazarın tələbatını ödəməyə, həm də ixracyönümlü istehsalın həcmini artırmağa xidmət edir. Bütün bu işlər Azərbaycan dövlətinin Qarabağda iqtisadi potensialın bərpası, möhkəmlənməsi, həmçinin müxtəlif təyinatlı məhsul istehsalının təşkili istiqamətində atılan məqsədyönlü addımların bir hissəsidir. Gələcəkdə isə onların məhsulların Avropa bazarına ixracı da planlaşdırılır.

Qalereya

Sabah hava meteohəssas insanlar üçün necə olacaq?

Mayın 30-na olan tibbi-meteoroloji proqnoz açıqlanıb.

BAKU.WS xəbər verir ki, bu barədə Milli Hidrometeorologiya Xidməti məlumat yayıb.

Bildirilib ki, Abşeron yarımadasında xəzri küləyinin güclənəcəyi və rütubətli hava şəraitinin müşahidə olunacağı gözlənilir.

Qeyd olunub ki, belə hava şəraiti bəzi meteohəssas insanlarda narahatlıq hissi yarada bilər. Buna görə də həssas şəxslərə sağlamlıqlarına diqqət yetirmələri tövsiyə olunur.