"Mingəçevir Reqatası-2026" turnirinin qalibi Əlimurad Hacızadə: "Avarçəkmədə özünəinam vacibdir"

Avarçəkmə idman növündə özünəinam vacibdir.

"Far.Az"un Mingəçevirə ezam olunan əməkdaşının məlumatına görə, bunu "Mingəçevir Reqatası-2026" beynəlxalq turnirinin qalibi olan Əlimurad Hacızadə deyib.

O, qarşıdakı planları haqqında danışıb:

"Bu idman növündə özünəinam vacibdir. Qalib olduğuma görə çox sevinirəm. Qarşıdan "Prezident Kuboku" yarışı gəlir. Hazırlaşacağıq və yaxşı nəticə göstərməyə çalışacağıq".

Qeyd edək ki, Ə.Hacızadə "Mingəçevir Reqatası-2026" beynəlxalq turnirində akademik avarçəkmə üzrə 1 nəfərlik qayıqda 1000 metr məsafəyə yarışın qalibi adını qazanıb.

Azərbaycanın stolüstü tennisçiləri Tbilisidə 5 medal qazanıblar

Azərbaycan stolüstü tennisçiləri Gürcüstanın paytaxtı Tbilisidə keçirilən "WTT Youth Contender Tbilisi 2026" turnirində 5 medal qazanıblar.

Bu barədə "Report"a Azərbaycan Stolüstü Tennis Federasiyasından məlumat verilib.

Milli komandaların baş məşqçiləri Mixail Timofeyev, Elnur Hidayətzadə və Ramil Cəfərovun rəhbərliyi ilə qonşu ölkəyə yollanan 10 idmançıdan 5-i mükafatçılar sırasında yer alıb.

Onur Quluzadə U-19, Cəfər Almədədli, Əliəkbər Mirzəliyev, Gülnur Kərimli və Səidə Quluzadə isə U-11 yaş kateqoriyasında bürunc medala sahib çıxıblar.

Azərbaycan boksçuları U-17 Avropa çempionatında iştirak edəcəklər

Azərbaycan boksçuları oktyabrın 3-də Monteneqronun Budva şəhərində start götürəcək U-17 Avropa çempionatında iştirak edəcəklər.

Azərbaycan Boks Federasiyasından "Report"a verilən məlumata görə, 9 gün davam edəcək yarışda yığma 21 idmançı ilə təmsil olunacaq.

Məşqçilər korpusu Aysel Fərəcova (46 kq), Aydan İsmayıllı (48 kq), Leyla Mahmudlu (52 kq), Alsu Yafarova (54 kq), Cəmilə Muradlı (57 kq), Fidan Bakarova (63 kq), Səma Abbasova (66 kq), Xumar Cəfərli (+80 kq), Həsrət Məmmədov (46 kq), Nihad Məmmədli (48 kq), Vaqif Məmmədli (50 kq), İsmayıl Nəsirzadə (52 kq), Qardaş Rəhimov (54 kq), Məhəmmədəli İstamov (57 kq), Əli Abaslı (60 kq), Məhəmmədəli Rüstəmov (63 kq), Yusif Həsənli (66 kq), Hidayət Məmmədov (70 kq), Yusif Ağakişiyev (75 kq), Şükar Əliyev (80 kq) və Mehran Rəsulova (+80 kq) güvənəcək.

Avropa çempionatında Anar Nağdıyev və Qalib Əbiyev isə Azərbaycanı hakim kimi təmsil edəcəklər.

Qeyd edək ki, yarışda 40 ölkənin 500-dək boksçusunun iştirakı gözlənilir. Budvaya oktyabrın 1-də yollanacaq boksçularımız ayın 12-də Bakıya qayıdacaqlar.

Recep Öztop: "Mingəçevir Reqatası"nın bütün dünyada nüfuz qazanacağına şübhəmiz yoxdur"

Mingəçevir Reqatası"nın gələcəkdə bütün dünyada yayımlanan və nüfuz qazanan turnir olacağına heç bir şübhə yoxdur.

"Far.Az"un bölgəyə ezam olunan əməkdaşının məlumatına görə, bunu Türkiyənin Gəncədəki Baş konsulu Recep Öztop deyib.

Diplomat Türkiyə komandalarının mübarizəyə böyük həvəslə qoşulduğunu vurğulayıb:

"Hər il olduğu kimi, bu il də "Mingəçevir Reqatası"nda iştirak edirəm. Türkiyədən olan komandalarımız ildə iki dəfə buradakı turnirə böyük həyəcanla qatılırlar. Bu yarışlar Azərbaycanda və beynəlxalq aləmdə artıq ənənəvi xarakter alıb. Turnir böyük mübarizəyə səhnə olur".

Recep Öztop yarışın gələcək perspektivinə də toxunub:

"Türkiyə olaraq qardaş ölkədəki turnirdə hər zaman təmsil olunmaqdan böyük məmnunluq duyuruq. Növbəti illərdə də buradakı mübarizənin bütün dünyada yayımlanan və nüfuz qazanan bir yarış olacağına heç bir şübhəmiz yoxdur".

Qeyd edək ki, oktyabrın 1-də yekunlaşacaq "Mingəçevir Reqatası-2026" turnirində Azərbaycanla yanaşı, Çexiya, Gürcüstan, Macarıstan, Qırğızıstan, Latviya, Litva, Moldova, Tacikistan, Türkiyə, Ukrayna və Özbəkistandan 100-dən çox gənc avarçəkən mübarizə aparır.

Ağakərim Səmədzadə Azərbaycan Alpinizm Federasiyasının yeni prezidenti seçilib

Ekologiya və təbii sərvətlər nazirinin birinci müavini Ağakərim Səmədzadə Azərbaycan Alpinizm Federasiyasının yeni prezidenti seçilib.

Bu barədə "Report"a Gənclər və İdman Nazirliyinin mətbuat xidmətindən məlumat verilib.

Bildirilib ki, bu gün Azərbaycan Alpinizm Federasiyası İctimai Birliyinin ümumi yığıncağı keçirilib. Gənclər və İdman Nazirliyinin inzibati binasında keçirilən yığıncaqda nazir Fərid Qayıbov iştirakçıları salamlayaraq onlara uğurlar arzulayıb.

O, 4 il ərzində federasiyaya rəhbərlik etmiş Muxtar Babayevə fəaliyyətinə görə minnətdarlığını bildirib. M.Babayev çıxış edərək göstərilən etimada görə təşəkkürünü ifadə edib.

İclasın gündəliyi təsdiqləndikdən sonra Azərbaycan Alpinizm Federasiyası İctimai Birliyinin 2022-2026-cı illər ərzində gördüyü işlərə dair hesabat təqdim olunub, səsvermə ilə təsdiqlənib.

Daha sonra federasiyanın rəhbərliyinə seçki keçirilib. Ekologiya və təbii sərvətlər nazirinin birinci müavini Ağakərim Səmədzadə Azərbaycan Alpinizm Federasiyasının yeni prezidenti seçilib. Yığıncaqda çıxış edən A.Səmədzadə göstərilən etimada görə təşəkkürünü bildirib və alpinizmin inkişafı istiqamətində əlindən gələni edəcəyini vurğulayıb.

Mahir Məmmədov: "Olimpiadanın nəticələrini təhlil edərək hazırlıq proqramını gücləndirəcəyik"

Azərbaycan Şahmat Federasiyası səhvlərin üzərində işləyərək həm kişi, həm də qadın qrossmeysterlərin gələcəkdə beynəlxalq yarışlarda uğur qazanması üçün hazırlıq və dəstək proqramlarını daha da gücləndirəcək.

Bu barədə "Report"a Azərbaycan Şahmat Federasiyasının prezidenti Mahir Məmmədov açıqlama verib.

O, Özbəkistanın Səmərqənd şəhərində keçirilən 46-cı Ümumdünya Şahmat Olimpiadasının yekunları ilə bağlı fikirlərini bölüşüb:

"Azərbaycan Şahmat Federasiyası olaraq, bu nəticələri ətraflı təhlil edəcəyik. Səhvlərimiz üzərində işləyərək həm kişi, həm də qadın şahmatçılarımızın gələcəkdə beynəlxalq arenalarda uğur qazanması üçün hazırlıq və dəstək proqramlarını daha da gücləndirəcəyik. Mütləq qaydada yığmaların çıxışı təhlil olunacaq".

M.Məmmədov hər iki komandanın əzmkarlıqla mübarizə apardığını söyləyib:

"Kişilərdən ibarət millimiz çox gərgin keçən yarış marafonunu 5-ci sırada tamamlayaraq ilk "onluq"da yerini təsdiqlədi. Medal qazanmağa çox yaxın idik, xüsusilə gənc və təcrübəli şahmatçılarımız gələcək üçün böyük perspektiv vəd etdiyini sübut etdi. Qadınlardan ibarət kollektiv isə yarışı 16-cı yerdə başa vurdu. Onların potensialının bundan qat-qat yüksək olduğunu bilirik. Bəzi turlarda xal itkiləri olsa da, bu səviyyəli turnirdə qazanılan təcrübə növbəti yarışlarda daha uğurlu nəticələr əldə etməyimizə kömək edəcək".

Qeyd edək ki, 46-cı Ümumdünya Şahmat Olimpiadasında Azərbaycanın kişilərdən ibarət komandası 17 xalla 5-ci olub. Qadınlardan ibarət kollektiv isə 15 xalla 16-cı yeri tutub.

Fərhad Əliyev: "Azərbaycanda idman balıqçılığı üzrə milli komanda formalaşdırılacaq"

Azərbaycanda idman balıqçılığı üzrə yarışların nəticələrinə uyğun olaraq milli komanda formalaşdırılacaq.

"Far.Az"un Füzuliyə ezam olunan əməkdaşının məlumatına görə, bunu Azərbaycan Su İdmanı Federasiyasının (AZSİF) icraçı vitse-prezidenti Fərhad Əliyev "Mingəçevir Reqatası-2026"nın ilk mərhələsindən sonra jurnalistlərə açıqlamasında deyib.

O, yerli idmançıların göstəricilərinin ildən-ilə yaxşılaşdığını bildirib:

"Kanoe üzrə inkişaf var. Əvvəllər kanoedə tək idmançı çıxış edirdisə, artıq bir neçə təmsilçi və komanda var. Azərbaycan çempionatında qarışıq idman növlərində həm oğlanlar, həm də qızlar mübarizə aparırlar. Bakıda və Mingəçevirdə təlim-məşq prosesi davam edir. Mingəçevirin təlim bazası kimi fəaliyyət göstərməsi barədə qərar verilib. Növbəti il belə təlim məkanlarının sayı artacaq".

AZSİF rəsmisi yarış cədvəllərinin üst-üstə düşməməsi üçün atılan addımlara da toxunub:

"Çətinlik ondan ibarətdir ki, eyni vaxtda yarışlar üst-üstə düşə bilir. Bu il çalışıldı ki, yelkənli idman, idman balıqçılığı, akademik avarçəkmə, kanoe və kayak üzrə turnirlər arasında müəyyən vaxt fərqi yaransın. Bir həftə öncə balıqçılıq, üç həftə əvvəl isə yelkənli idman üzrə Azərbaycan çempionatı təşkil olundu".

O, idman balıqçılığının inkişafı və beynəlxalq yarışlarda iştirak imkanları barədə danışıb:

"İdman balıqçılığının özünəməxsus qaydaları var. Bu növ üzrə Avropa və dünya çempionatları keçirilir. Əvvəllər federasiya olmadığı üçün idmançılar həmin turnirlərə qatıla bilmirdilər. Artıq federasiya nəzdində fəaliyyət göstərdikləri üçün beynəlxalq yarışlara yollana biləcəklər. Yaxın bir həftə ərzində Türkiyədə turnir təşkil olunacaq. Həmin yarışdakı nəticələrə uyğun olaraq milli komanda formalaşacaq və gələcək üçün təqvim planı müəyyənləşəcək".

Bakıda keçiriləcək üzgüçülük üzrə "İpək Yolu" Dünya Kubokunun maskotları açıqlanıb

Bakıda keçiriləcək üzgüçülük üzrə "İpək Yolu" Dünya Kubokunun rəsmi maskotları təqdim olunub.

Bu barədə "Report"a Azərbaycan Üzgüçülük Federasiyasından (AÜF) məlumat verilib.

AÜF-ün təqdim etdiyi maskotlar "Araz", "Damla" və "Xəzər" adlanır.

Maskotlar üzgüçülüyə marağın və suya olan sevginin rəmzi kimi hazırlanıb. Onlar həm ən kiçik üzgüçülük həvəskarlarını, həm də peşəkar idmançıları əhatə edən auditoriyaya xitab edir.

Maskotların əsas missiyalarından biri su ehtiyatlarından səmərəli istifadənin əhəmiyyətinə diqqət çəkməkdir. Eyni zamanda, qəhrəmanlar vasitəsilə Xəzər dənizində su səviyyəsinin azalması məsələsinin diqqətdə saxlanılması nəzərdə tutulur.

Qeyd edək ki, "Araz", "Damla" və "Xəzər"lə "İpək Yolu" Dünya Kubokunun "Bakı 2026" mərhələsi çərçivəsində keçiriləcək tədbirlər zamanı yaxından tanış olmaq mümkün olacaq.

"Mingəçevir Reqatası-2026"nın Füzulidə keçirilən mərhələsinin qalibləri mükafatlandırılıb

"Mingəçevir Reqatası-2026"nın Füzulidə keçirilən mərhələsinin qalibləri mükafatlandırılıb.

"Report"un bölgəyə ezam olunan əməkdaşının məlumatına görə, turnirin ilk günündə 1 nəfərlik kanoe və kayakda 200 metr məsafəyə yarışlar keçirilib.

Azərbaycan təmsilçiləri 4 medal qazanıblar.

Əlimurad Hacızadə birinci, Nuran Rəhimli (hər ikisi 2008/2009) ikinci, Hüseyn Səmədli (2008/2009) və Elmir Tarverdiyev (2010/2011) isə üçüncü pilləni tutub.

Mükafatları qaliblərə gənclər və idman naziri Fərid Qayıbov və Azərbaycan Su İdmanı Federasiyasının rəhbəri Vüqar Əhmədov təqdim ediblər.

Fərid Qayıbov: "İşğaldan azad olunmuş ərazilərdə idman yarışlarının arealı genişlənir"

Azərbaycanın işğaldan azad edilmiş ərazilərində keçirilən idman yarışlarının arealı ildən-ilə genişlənir.

"Report" xəbər verir ki bunu gənclər və idman naziri Fərid Qayıbov "Mingəçevir Reqatası-2026" beynəlxalq turnirinin açılış mərasimində deyib.

O, azad edilmiş torpaqlarda keçirilən turnirlərin əhəmiyyətini qeyd edib:

"Üçüncü dəfədir təşkil olunan yarış artıq ənənəyə çevrilib. Mingəçevir reqatası hər il keçirilir və azad olunmuş torpaqlarımızda növbəti idman bayramıdır. Ölkə başçısının tapşırıqlarına əsasən bütün sahələr, həmçinin idman inkişaf edir. Qarabağın müxtəlif şəhərlərində yeni idman bölmələri açılır, həm yerli, həm də beynəlxalq yarışlar keçirilir. Bizi sevindirən hal odur ki, turnirdə artıq 12 ölkədən iştirakçılar var. Təşkilatçılığın səviyyəsi çox yüksəkdir. Bütün idmançılara uğurlar arzulayırıq və inanırıq ki, bu yarışlar növbəti illərdə daha da genişlənəcək. Ümid edirəm ki, gələcəkdə Avropa və dünya çempionatlarını da həm burada, həm də Mingəçevirdə keçirəcəyik".

Nazir azad edilmiş ərazilərdə idman infrastrukturunun qurulması istiqamətində görülən işlərdən bəhs edib:

"Bir çox federasiyalar artıq hər il beynəlxalq yarışlar keçirirlər. Velosiped, şahmat turnirləri var və yeni idman bölmələri açılır. Bütün federasiyalarla birlikdə bu sahəni daha da genişləndirməyə çalışırıq. Füzulidə idman zalı, Ağdamda stadion tikiləcək, digər rayonlarda da idman zallarının inşası planlaşdırılır. Bu obyektlər istifadəyə verildikcə yarışların arealı daha da artacaq".

F.Qayıbov su idmanı növlərinin inkişafı və yerli əhalinin bu sahəyə marağı barədə danışıb:

"Artıq azad olunmuş torpaqlarımızda üç su anbarında - Suqovuşan, Köndələnçay və Sərsəngdə bu yarışları keçirmişik. Sevindirici haldır ki, yarışlara çoxlu yerli uşaq və əhali toplaşır. Bu, həmin idman növünü burada daha da inkişaf etdirməyin mümkünlüyünü göstərir. Uşaqlar üçün təkcə bu idman növündə deyil, digər sahələrdə də yeni bölmələr açılmalıdır. Məktəblərimizdə yaxşı şərait var və uşaqlar oradakı zallardan istifadə edirlər".

Nazir su idmanı növləri üzrə yerli idmançıların çıxışına toxunub:

"Əvvəllər bu idman növü yalnız Mingəçevirdə idi. Artıq Bakıda da bölmələrimiz var. Azərbaycanda göllər və su anbarları çoxdur. Federasiya ilə birgə bu idman bölmələrinin digər rayonlarda da açılması planlaşdırılır. Yaxın gələcəkdə rəqabətin daha da artacağını izləyəcəyik".

F.Qayıbov Bakının böyük beynəlxalq yarışlara ev sahibliyi etdiyini xatırladıb:

"Bakı dünyanın idman paytaxtıdır. İlin əvvəlindən bir çox federasiyalar beynəlxalq yarışlar, dünya çempionatları və dünya kubokları keçiriblər. "Formula 1" üzrə Azərbaycan Qran-prisi yeni başa çatdı. Bir neçə gündən sonra Bakıda ilk dəfə üzgüçülük üzrə Dünya Kuboku start götürəcək. Ardınca cüdo və sumo üzrə dünya çempionatları təşkil olunacaq. Voleybol üzrə Avropa çempionatı da yeni bitib. Bütün idmançılarımıza uğurlar arzulayırıq".

Qeyd edək ki, "Mingəçevir Reqatası-2026" beynəlxalq turnirində Azərbaycanla yanaşı, Çexiya, Gürcüstan, Macarıstan, Qırğızıstan, Latviya, Litva, Moldova, Tacikistan, Türkiyə, Ukrayna və Özbəkistandan 100-dən çox gənc avarçəkən mübarizə aparacaq.

Füzulidə "Mingəçevir Reqatası-2026" beynəlxalq turnirinin açılış mərasimi keçirilib

Gənclər və İdman Nazirliyi, Azərbaycan Su İdmanı Növləri Federasiyasının (ASNİF) birgə təşkilatçılığı ilə "Mingəçevir Reqatası-2026" beynəlxalq turnirinin açılış mərasimi bu gün Füzulidə baş tutub.

"Report"un bölgəyə ezam olunan əməkdaşının məlumatına görə, mərasim Köndələnçay su anbarında keçirilib.

Azərbaycan Himninin səsləndirilməsi və şəhidlərin xatirəsinin 1 dəqiqəlik sükutla yad olunmasından sonra gənclər və idman naziri Fərid Qayıbov çıxış edib. O, yarışın əhəmiyyətindən və işğaldan azad olunmuş bölgələrdə idmanın inkişafından danışıb. Sonda iştirakçılara uğurlar arzulayıb.

Daha sonra avarçəkənlərin nümunəvi çıxışları və maraqlı su şouları təşkil olunub.

Yeniyetmələr üçün müxtəlif viktorinalar və intellektual yarışmalar keçirilib. Füzuli sakinləri üçün həvəskar avarçəkmə qayıqlarında özlərini sınamaq imkanı da yaradılıb.

Sonda federasiya tərəfindən xatirə hədiyyələri təqdim olunub.

Xatırladaq ki, "Mingəçevir Reqatası-2026" beynəlxalq turniri oktyabrın 1-də yekunlaşacaq.

Yarışda Azərbaycanla yanaşı, Çexiya, Gürcüstan, Macarıstan, Qırğızıstan, Latviya, Litva, Moldova, Tacikistan, Türkiyə, Ukrayna və Özbəkistandan 100-dən çox gənc avarçəkən mübarizə aparacaq.

Budapeştdə üçüncü olan Vahab Fətullayev: "Qarşıda daha yaxşı nəticələr qazanacağıma inanıram"

Macarıstanın paytaxtı Budapeştdə keçirilmiş beynəlxalq turnirdə bürünc medal qazanan şpaqa üzrə Azərbaycan millisinin üzvü Vahab Fətullayev qarşıda daha yaxşı nəticələr qazanacağına inanır.

İdmançı bu barədə "Report"a açıqlamasında deyib.

O, "Kadet-Junior Parbajtor Magyar Kupa 3" yarışı ilə bağlı təəssüratlarını bölüşüb:

"Əsas hədəfim inkişaf etmək, çatışmazlıqlar üzərində işləmək və növbəti yarışlara daha yaxşı hazırlaşmaqdır. Qarşıda daha yaxşı nəticələr olacağına inanıram. Bu turnir mənim üçün yaxşı keçdi. Özümü yaxşı hiss edirdim. Yarışda kifayət qədər böyük rəqabət var idi, amma özümü toparlayıb diqqətimi qorumağa və hər görüşə maksimum köklənməyə çalışdım. Açığı, yarış zamanı nəticə haqqında çox düşünmürdüm. Əsas məqsədim özümə və görüşlərimə fokuslanmaq, qələbə üçün əlimdən gələni etmək idi".

V.Fətullayev yarımfinalda uduzması barədə danışıb:

"Finala çıxmaq mümkün olmadı. Görüşün müəyyən məqamlarında daha fəal və cəsarətli çıxış edə bilərdim. Amma bu da mənim üçün yaxşı bir təcrübə oldu və üzərində işləməli olduğum məqamları əyani göstərdi. Üçüncü yeri tutduğum üçün şadam. Əlbəttə, həmişə daha yaxşısını istəyirik, amma bu nəticəni müsbət qəbul edirəm və bu məni daha yüksək nəticələr qazanmağa motivasiya edir".