Neftin qiyməti yenidən 110 dolları ötüb

Londonun "ICE" birjasında "Brent" markalı neftin iyun ayı üçün fyuçerslərinin qiyməti 5 maydan bəri ilk dəfə bir barel üçün 110 dolları ötüb.

"Far.Az" xəbər verir ki, Bakı vaxtı ilə saat 02:00-a olan məlumata görə, "Brent" markalı neftin qiyməti 1,91% artaraq barel üçün 111,35 dollara çatıb.

Bakı vaxtı ilə saat 02:20-yə qədər "Brent" neftinin qiyməti artımını yavaşladaraq barel üçün 110,40 dollara çadıb (1,04% artım).

FT: İranla bağlı vəziyyətə görə qlobal enerji böhranı yeni bir mərhələyə qədəm qoyur

ABŞ və İsrailin İrana qarşı müharibəsindən sonra yaranan qlobal enerji böhranı yay, kondisionerlərə və səyahətə tələbatın gözlənilən artımından əvvəl yeni bir mərhələyə qədəm qoyur.

"Far.Az"un məlumatına görə, bu barədə "Financial Times" yazıb.

"İranla bağlı münaqişənin yaratdığı enerji böhranının yeni və daha təhlükəli mərhələsinə qədəm qoyduğu bir vaxtda təxminən 80 ölkə iqtisadiyyatlarını qorumaq üçün təcili tədbirlər tətbiq edib. Yayın əvvəlində Şimal yarımkürəsində kondisionerlərə və istirahət səyahətlərinə artan tələbat xam neft, benzin, dizel və reaktiv yanacaq tədarükünə əlavə təzyiq göstərəcək", - deyə məlumatda qeyd olunub.

Aberdin Universitetinin baş iqtisadçısı Pol Diql bildirib ki, onun komandası hazırda Brent markalı xam neftin qiymətinin bir barel üçün 180 dollara qədər yüksələcəyi və bunun bir sıra Avropa və Asiya ölkələrində inflyasiyanın kəskin şəkildə artmasına və tənəzzülə səbəb olacağı ssenarini araşdırır.

Tuvalu Azərbaycanın günəş enerjisi sahəsindəki təcrübəsi ilə maraqlanır - EKSKLÜZİV

Azərbaycan və Tuvalu arasında günəş-dizel enerji qurğuları sahəsində qarşılıqlı fəaliyyət üçün ciddi potensial mövcuddur.

Bu barədə "Far.Az"a Bakıda keçirilən Ümumdünya Şəhərsalma Forumu (WUF13) çərçivəsində Tuvalunun ictimai işlər, infrastrukturun inkişafı və su ehtiyatları naziri Ampelosa Manoa Tehulu bildirib.

"Azərbaycan son vaxtlar su ehtiyatlarının idarə edilməsi sisteminin təkmilləşdirilməsi, infrastrukturun modernləşdirilməsi və su qənaəti texnologiyalarının tətbiqi sahəsində nəzərəçarpacaq irəliləyiş əldə edib. Tuvaluya gəldikdə isə torpaq qıtlığı əsas problem olaraq qalır. Torpaq resursları olduqda tikinti üçün imkanlar yaranır - sizin bunun üçün geniş əraziləriniz var. Bizdə isə torpaq olduqca azdır.

Bununla yanaşı, hesab edirəm ki, Tuvalu üçün su təhlükəsizliyi məsələsi çox kəskindir. Bu, hər gün qarşılaşdığımız bir fəlakətdir. Ölkəmizdə təbii çaylar yoxdur. Biz tamamilə yağıntılardan asılıyıq. Yağış yoxdur - su yoxdur. Buna görə də bu sahədə birgə iş üçün böyük potensial açılır", - nazir vurğulayıb.

Tehulunun qeyd etdiyi kimi, tərəfdaşlığın daha bir perspektivli istiqaməti günəş-dizel enerji qurğularına keçiddir. "Bu, əla ideyadır. Biz günəş-dizel qurğularına keçmək üçün səy göstəririk. Hesab edirəm ki, bu istiqamətdə də əməkdaşlıq qura bilərik. Buna baxmayaraq, su problemi hələ də gündəlik fəlakət olaraq qalır. Bizə sizin mütəxəssislərinizin dəstəyi lazımdır", - nazir əlavə edib.

Ankara Bakıya "Sıfır tullantı" ekoloji layihəsinin tətbiqində dəstək təklif edib - EKSKLÜZİV

Türkiyə Azərbaycana "Sıfır tullantı" ekoloji təşəbbüsünün həyata keçirilməsində dəstək göstərməyə hazırdır.

Bunu "Far.Az"a açıqlamasında Türkiyənin ətraf mühit, şəhərsalma və iqlim dəyişikliyi nazirinin müavini Ömər Bulut Ümumdünya Şəhərsalma Forumunun 13-cü sessiyasının (WUF13) kuluarlarında bildirib.

"Sıfır tullantı" təşəbbüsü birinci xanım Əminə Ərdoğanın rəhbərliyi altında flaqman layihə kimi həyata keçirilir. "Sıfır tullantı"nın əsas prinsipi son dərəcə aydındır: çirklənməyə nə qədər az yol verirsinizsə, ətraf mühit bir o qədər yaxşı qorunur. Bu gün təbiətin mühafizəsinə nəhəng resurslar sərf olunur. Məhz buna görə də "sıfır tullantı" konsepsiyası həm israfçı istehlakla mübarizə aləti, həm də planetin plastik və digər kimyəvi çirkləndirici maddələrdən qorunması vasitəsidir", - nazir müavini vurğulayıb.

Ö.Bulut qeyd edib ki, Türkiyə bu istiqamətdə əhəmiyyətli iş aparır və daxili səviyyədə nəzərəçarpan nəticələr əldə edir. "Analoji təcrübə Azərbaycana da lazımdır. Azərbaycan böyük bir dənizə malikdir - Qərbdə onu göl hesab etsələr də, Azərbaycan xalqı üçün bu, tamhüquqlu bir dənizdir. İlkin vəziyyətini qoruyub saxlamış bu unikal məkan çirklənməyə məruz qalmamalıdır. Çirklənməyə yol verib sonra təmizləməklə məşğul olmaqdansa, onun qarşısını almaq daha ağlabatandır. Buna görə "sıfır tullantı" sahəsində layihə və ideyaların qarşılıqlı mübadiləsi davam etdiriləcək. Biz bu layihənin Azərbaycanda tətbiqinə dəstək göstərməyə hazırıq", - nazir müavini bəyan edib.

Azərbaycan Xəzərdə külək enerjisi potensialının tədqiqinə başlayıb

"EOLOS Floating LiDAR Solutions" şirkəti Xəzər dənizində "Azerbaijan Green Energy Company" (AGEC) şirkətinin dəniz külək enerjisinin işlənməsi sahəsində FLS200 modelli inteqrasiya olunmuş üzən LiDAR dəniz nişanını (buy) istismara verib.

"Report" EOLOS-a istinadən xəbər verir ki, bu kampaniya həmin regionda dəniz külək zonalarının qiymətləndirilməsi üzrə öz növündə ilk təşəbbüs olub.

Qeyd edək ki, EOLOS şirkəti 2026-cı ilin yanvarında dəniz obyektində ölçmə kampaniyasının kompleks şəkildə həyata keçirilməsi üzrə tenderdə müqavilə qazanıb. EOLOS-un məlumatına görə, "OWC" şirkəti ("ABL Group"a daxildir) işlərin həcmi və satınalma prosesi üzrə texniki məsləhətçi qismində çıxış edib.

Kampaniyanın bir il davam edəcəyi gözlənilir. Onun məqsədi turbinlərin və bünövrə növlərinin seçilməsi üçün zəruri olan investisiya sinfinə (bank səviyyəsinə) aid məlumat massivlərini təqdim etməkdir.

Xatırladaq ki, müqavilə AGEC ilə Azərbaycanın Energetika Nazirliyi arasında Xəzər dənizində ilkin tədqiqatların və hazırlıq işlərinin aparılmasına dair saziş çərçivəsində bağlanıb.

2025-ci ilin dekabrında məlumat verilmişdi ki, Energetika Nazirliyi AGEC-in törəmə strukturu olan "Clean Energy Capital" şirkəti ilə ilkin gücü 200 MVt və ümumi gücü 600 MVt olan dəniz külək enerjisi sahəsində layihənin qiymətləndirilməsi, işlənməsi və həyata keçirilməsi haqqında saziş bağlayıb.

Asiya İnkişaf Bankının (ADB) Azərbaycandakı nümayəndəliyinin rəhbəri Sunniya Durrani-Camal "Report"a şərhində daha əvvəl bildirib ki, ölkə dəniz (ofşor) külək enerjisi infrastrukturunun formalaşdırılmasına dəstək göstərilməsi üçün ADB sorğu göndərib.

Öz növbəsində, "Acwa" şirkətinin Mərkəzi Asiya üzrə regional prezidenti Abid Malik "Report"a müsahibəsində vurğulayıb ki, şirkət Azərbaycanda bu cür layihələrin texniki-iqtisadi əsaslandırılmasının qiymətləndirilməsində iştirak etmək niyyətindədir.

Qeyd edək ki, Azərbaycan 2030-cu ilə qədər enerji balansında bərpa olunan enerji mənbələrinin payını 38 %-ə çatdırmağı hədəfləyir. Bunun üçün hazırda 8 QVt gücündə bərpa olunan enerji mənbələri layihələri həyata keçirilir.

Əl-Məzrui: "BƏƏ-nin OPEC-dən çıxması fikir ayrılıqlarının olması demək deyil"

Birləşmiş Ərəb Əmirliklərinin (BƏƏ) OPEC və "OPEC+"dan çıxmaqla bağlı qərarı siyasi motivli olmayıb və tərəfdaşlarla fikir ayrılıqlarının mövcudluğunu əks etdirmir.

"Report" xəbər verir ki, bu barədə BƏƏ-nin energetika naziri Süheyl Məhəmməd Fərəc Əl-Məzrui "X" sosial şəbəkəsindəki hesabında paylaşım edib.

"BƏƏ-nin OPEC və "OPEC+"dan çıxmaq barədə qərarı ölkənin uzunmüddətli iqtisadi baxışına, inkişaf edən enerji imkanlarına və qlobal enerji təhlükəsizliyinə qəti sadiqliyinə əsaslanan suveren strateji seçimdir", - o yazıb.

Nazirin sözlərinə görə, bu qərar ölkənin neft sənayesinin perspektivlərinin hərtərəfli qiymətləndirilməsindən sonra qəbul edilib: "Qərar siyasi mülahizələrlə diktə edilməyib və BƏƏ ilə onun tərəfdaşları arasında hər hansı fikir ayrılığının mövcudluğunu göstərmir. BƏƏ qərarları xarici fərziyyələri deyil, milli maraqları rəhbər tutaraq qəbul edir".

Qeyd edək ki, dünyanın ən böyük neft istehsalçılarından biri olan BƏƏ 2026-cı il mayın 1-dən etibarən OPEC-dən çıxıb.

Azərbaycan nefti 3 dollara yaxın bahalaşıb

Dünya bazarında "Azeri Light" markalı Azərbaycan neftinin 1 barelinin qiyməti 2,93 ABŞ dolları və ya 2,58 % artaraq 116,41 ABŞ dolları təşkil edib.

Bu barədə "Far.Az"a neft bazarındakı mənbə məlumat verib.

Hərracların nəticələrinə görə, "Brent" markalı neftin iyul fyuçerslərinin qiyməti 112,2 ABŞ dolları təşkil edib.

Türkiyənin Ceyhan limanında FOB bazasında "Azeri Light" markalı Azərbaycan neftinin bir barelinin qiyməti 2,96 ABŞ dolları və ya 2,67 % artaraq 113,94 ABŞ dolları təşkil edib.

Azərbaycanın builki dövlət büdcəsində bir barel neftin orta qiyməti 65 ABŞ dollarından hesablanıb.

Xatırladaq ki, "Azeri Light" neftinin ən aşağı qiyməti 2020-ci il aprelin 21-də (15,81 ABŞ dolları), maksimal qiyməti isə 2008-ci ilin iyulunda (149,66 ABŞ dolları) qeydə alınıb. Azərbaycanda bu markadan olan neft "Azəri-Çıraq-Günəşli" (AÇG) yataqlar blokunun işlənməsi haqqında müqavilə çərçivəsində hasil edilir. Müqavilədə Azərbaycan Dövlət Neft Şirkətinin (SOCAR) payı 31,65 %-dir.

Biləsuvarın bəzi ərazilərində üç saat işıq olmayacaq

Bu gün Biləsuvar rayonunun bəzi ərazilərində elektrik enerjisinin verilişində fasilə yaranacaq.

Bu barədə "Report"a "Azərişıq" ASC-yə istinadən xəbər verir.

Beə ki, mayın 16-da Biləsuvar Elektrik Şəbəkəsinin ərazisində 110/35/10 kV-luq "Biləsuvar" yarımstansiyasından çıxan 10 kV-luq 6 və 11 saylı hava xətlərində təmir işləri aparılacaq.

Bununla əlaqədar saat 10:00-dan 13:00-dək şəhər ərazisində Mübariz İbrahimov, Səməd Vurğun, Mirzə Ələkbər Sabir, Azadlıq, Tofiq İsmayılov küçələri, eləcə də rayonun Bəydili, Aşağı Cürəli kəndlərinin bir hissəsində elektrik enerjisinin verilişində məhdudiyyət yaranacaq. Təmir işləri yekunlaşdıqdan sonra həmin ərazilər daha keyfiyyətli elektrik enerjisi ilə təmin olunacaq.

Mircəlal Hüseynov: "Şəfəq" GES yaşıl enerjinin ölkə üzrə hərəkətini təmin edən strateji körpüdür

"Şəfəq" Günəş Elektrik Stansiyasının (GES) inşası Azərbaycanda yaşıl enerjinin ölkə üzrə hərəkətini təmin edən strateji bir körpüdür.

Bu sözləri "Far.Az"un Qarabağ bürosunun Cəbrayıl rayonuna ezam olunmuş əməkdaşına açıqlamasında "AzərEnerji" ASC-nin Qarabağ Regional Elektrik Şəbəkəsinin direktoru Mircəlal Hüseynov bildirib.

Onun sözlərinə görə, işğaldan azad edilmiş ərazilərdə ilk sənaye miqyaslı günəş elektrik stansiyası Cəbrayıl rayonunun Soltanlı kəndi ərazisində inşa edilib: "240 meqavatlıq "Şəfəq" GES-in enerji sistemə inteqrasiyası üçün Azərbaycan dövləti tərəfindən irihəcmli işlər həyata keçirilib. Bu stansiya xarici investisiya layihəsi olaraq BP şirkəti tərəfindən inşa edilib".

M.Hüseynov qeyd edib ki, bu çərçivədə "AzərEnerji" tərəfindən Cəbrayılda 330 kV-luq rəqəmsal yarımstansiya tikilib və bu yarımstansiyanı ölkənin enerji şəbəkəsinə qoşmaq üçün "Cəbrayıl" Enerji Qovşağına 7,5 kilometr uzunluğunda 330 kV-luq ikidövrəli yüksəkgərginlikli ötürmə xətti çəkilib.

O vurğulayıb ki, "Şəfəq" GES-in enerji sisteminə inteqrasiyası üçün həyata keçirilən layihənin əsas məqsədi dövlət və özəl sektor əməkdaşlığını gücləndirmək, karbon emissiyalarını azaltmaq, təbii qaza qənaət etmək, yaşıl enerjinin payını artırmaq və enerji təhlükəsizliyini daha da möhkəmləndirməkdir: "Bu irihəcmli yaşıl enerjinin ötürülməsi layihəsi paralel şəkildə davam etdirilib. Belə ki, Səngəçal terminalının yaşıl enerji ilə təchizatı məqsədilə yeni 220 kilovoltluq yarımstansiya tikilib və işlər artıq yekunlaşıb".

M.Hüseynov deyib ki, bu yenilik nəticəsində terminalda qazla işləyən elektrik stansiyası dayandırılacaq və Cəbrayılda Günəşdən əldə olunan enerji ümumi enerji sisteminə, oradan isə balanslaşdırılmış şəkildə həm də Səngəçal terminalına yönləndiriləcək: "Səngəçal terminalında təbii qazla işləyən 140 MVt gücündə modul tipli elektrik stansiyasının fəaliyyəti dayandırılmaqla terminalın illik tələbatının 500 milyon kV/saatın bərpa olunan enerji hesabına qarşılanması ilə illik 120-150 milyon kubmetrdən artıq təbii qaza qənaət ediləcək. Bu da BP şirkətinin Xəzər regionunda əməliyyat tullantılarının CO2 emissiyasının illik 260-330 min ton azaldılmasına töhfə verəcək".

Sofiyada Azərbaycan və Bolqarıstan arasında enerji təhlükəsizliyi məsələləri üzrə dəyirmi masa keçiriləcək

Azərbaycanın Bolqarıstandakı səfirliyinin təşəbbüsü ilə bu ilin oktyabrında Sofiyada yüksək səviyyəli dəyirmi masa keçiriləcək.

"Far.Az"un məlumatına görə, bu barədə səfirlik "Sinerjinin gücü: enerji təhlükəsizliyi və "yaşıl keçid" mövzusunda işçi səhər yeməyi zamanı məlumat verib.

Tədbirdə aparıcı Bolqarıstan unuversitetlərinin nümayəndələri, enerji, "yaşıl iqtisadiyyat", davamlı şəhərsalma üzrə mütəxəssislər və digər tərəflər iştirak ediblər.

İştirakçılar 2026-cı il üçün Sofiyada keçirilməsi planlaşdırılan yüksək səviyyəli müvafiq dəyirmi masa və hər iki ölkənin universitetləri arasında potensial konkret əməkdaşlıq layihələrinin hazırlanması ilə bağlı fikir mübadiləsi aparıblar.

Müzakirə enerji təhlükəsizliyi, "yaşıl keçid", dairəvi iqtisadiyyat, dayanıqlı şəhər inkişafı, texnoloji innovasiya və elmi tərəfdaşlıq sahələrində Azərbaycan-Bolqarıstan tərəfdaşlığının gücləndirilməsi imkanlarına, eyni zamanda daha geniş regional və enerji dayanaqlılığının araşdırılmasına yönəlib.

Müzakirələrdə iştirakçılar enerjinin şaxələndirilməsinin təmin edilməsində, dayanıqlı enerji infrastrukturunun gücləndirilməsində və enerji balansının daha təmiz və daha dayanıqlı enerji sistemləri ilə balanslaşdırılmasında regional əməkdaşlığın artan əhəmiyyətini vurğulayıblar.

Milli və şəhərlər səviyyəsində enerji təhlükəsizliyi, "yaşıl transformasiya" və yeni dayanıqlı iş yerlərinin yaradılmasına innovasiya yönümlü yanaşmaların dəstəklənməsində elmi institutların və elmi əməkdaşlığın roluna xüsusi diqqət yetirilib.

Görüşün enerji təhlükəsizliyi və "yaşıl keçid" üzrə sinerjinin təmin edilməsi üzrə dialoq və əməkdaşlığı daha da inkişaf etdirmək üçün siyasətçiləri, universitetləri, elmi dairələri, özəl sektoru və beynəlxalq mütəxəssisləri bir araya gətirəcəyi gözlənilir.

Bakıda "Yaşıl Enerji Dəhlizi" layihəsi üzrə nazirlərin iclası keçiriləcək

Bu ilin iyun ayının son ongünlüyündə Bakıda Azərbaycanı Avropa ilə birləşdirən "Black Sea Energy" - "Yaşıl Enerji Dəhlizi" layihəsi üzrə nazirlərin iclası keçiriləcək.

"Far.Az" xəbər verir ki, bunu "Yaşıl Enerji Dəhlizi" Birgə Müəssisəsinin (GECO, Black Sea Energy) baş direktoru Fərhad Məmmədov sosial şəbəkə hesablarında bildirib.

Onun sözlərinə görə, GECO-nun Direktorlar Şurası ötən iclasında əvvəlki sessiyadan sonra baş vermiş əsas hadisələri, o cümlədən maraqlı tərəflərlə işi, layihənin irəliləyişini və qarşıdan gələn nazirlər görüşünə hazırlıq tədbirlərini nəzərdən keçirib.

Xüsusi diqqət 2027-2028-ci illərdə büdcənin planlaşdırılmasına, həmçinin Qara dənizin dibinin tədqiqinə aid texniki aspektlərə yönəldilib. Bundan əlavə, "Xlinks" və "Zhero" şirkətlərinin nümayəndələrinin iştirakı ilə layihənin həyata keçirilməsi yollarının müzakirəsi baş tutub.

"Texniki-iqtisadi əsaslandırmanın yekun mərhələsinə və fəal post-fazaya keçidə hazırlıq yaxınlaşdıqca, diqqət getdikcə daha çox icra və strukturlaşdırmaya yönəlir. Bununla əlaqədar olaraq işin aşağıdakı əsas istiqamətləri əsas olaraq qalır: layihənin kompleks idarə edilməsi, mühəndislik fəaliyyəti, Aİ-də tənzimləyici və institusional mövqelənmə və onun sürətləndirilməsinə dəstək, kommersiya strategiyası və bazarın modelləşdirilməsi, həmçinin maliyyə qiymətləndirilməsi", - F.Məmmədov yazıb.

Bu layihənin həyata keçirilməsi 2022-ci ildə Buxarestdə Azərbaycan, Gürcüstan, Rumıniya və Macarıstan arasında "yaşıl enerji"nin inkişafı və ötürülməsi sahəsində strateji tərəfdaşlıq haqqında imzalanmış saziş çərçivəsində nəzərdə tutulur. Bu sənəd Avropaya yaşıl enerji dəhlizinin formalaşdırılması yolunda mühüm addım olub.

SOCAR və TPAO birgə həyata keçirdikləri layihələrin icra vəziyyətini müzakirə edib

Azərbaycan Dövlət Neft Şirkəti (SOCAR) və "Türkiye Petrolleri A.O." (TPAO) arasında bu şirkətlərin birgə iştirakı ilə həyata keçirilən layihələrin icra vəziyyəti müzakirə olunub.

"Report" SOCAR-a istinadən xəbər verir ki, bu barədə müzakirələr SOCAR-ın prezidenti Rövşən Nəcəf və TPAO-nun Xarici layihələr İdarəsinin rəisi Çağrı Şirin və Azərbaycandakı nümayəndəliyinin rəhbəri Halil Buğra Yavuz ilə görüşündə aparılıb.

Görüşdə SOCAR ilə TPAO arasında əlaqələrin inkişafından məmnunluq ifadə olunub, bu xüsusda, ötən il TPAO şirkətinin "Xəzər dənizinin Azərbaycan sektorundakı Şəfəq-Asiman perspektiv strukturunun birgə geoloji-kəşfiyyatı və işlənməsi üzrə hasilatın pay bölgüsü haqqında Saziş"ə qoşulmasının əməkdaşlığın genişləndirilməsi baxımından əhəmiyyəti qeyd olunub.

Söhbət zamanı qarşılıqlı maraq doğuran digər məsələlər ətrafında fikir mübadiləsi aparılıb.