Azərbaycanlı modellər "Fashion Culture Day in Paris"də çıxış ediblər

Azərbaycanlı modellər Fransanın paytaxtı Parisdə keçirilən "Fashion Culture Day in Paris"də kolleksiya təqdimatı ilə çıxış ediblər.

"Far.Az" xəbər verir ki, bu barədə Azərbaycanın Fransadakı səfirliyi "X" sosial şəbəkə hesabında məlumat paylaşıb.

"Yeni nəsil dizaynerlər "Fashion Culture Day in Paris"də Azərbaycanı ön plana çıxarıb", - paylaşımda bildirilib.

Səfirliyin dəstəyi ilə keçirilən dəb nümayişində Sevda Qadaşova, Aysel Hüseynova, Şəms Əbilsoy, Gülər Qurbanova, Anara Zakirli və Natəvan Əliyeva çıxış ediblər.

Qeyd edək ki, Azərbaycanın Fransadakı səfiri Leyla Abdullayeva da tədbirə qatılıb.

🇦🇿 À Paris, le «Fashion Culture Day in Paris» a mis à l’honneur la nouvelle génération de créateurs 🇦🇿.
Organisé par SİMOORG Academy et @AmisAzerbaidjan avec le soutien de @AzAmbassadeFr,l’événement a fait dialoguer mode contemporaine,savoir-faire textiles et patrimoine culturel. pic.twitter.com/EgdsrSYSXt

— Amis Azerbaïdjan en France (@AmisAzerbaidjan) October 3, 2026

Aİ səfiri: Bakıda "Avropa təamları" festivalı Azərbaycanla tərəfdaşlığın 30 illiyinə həsr olunub

Bu gün Bakıda açılan "Avropa təamları" (Taste of Europe) adlı kulinariya festivalı bu il Avropa İttifaqı-Azərbaycan tərəfdaşlığının 30 illiyinə həsr olunub.

"Report xəbər verir ki, bunu Aİ-nin Azərbaycandakı səfiri Mariyana Kuyundziç festivalın açılışında bildirib.

O vurğulayıb ki, bugünkü festival bu il qeyd olunan Aİ-Azərbaycan tərəfdaşlığının 30 illiyinə həsr edilmiş silsilə tədbirlər çərçivəsində keçirilir.

"Bakıda dördüncü "Avropa təamları" kulinariya festivalına ev sahibliyi etmək mənim üçün böyük şərəfdir. Biz azərbaycanlı dostlarımızı Avropa təamlarını və mədəniyyətini qeyd etmək üçün bizə qoşulmağa dəvət edirik! Bu, Avropa ölkələrinin milli mətbəxi, mədəniyyəti və ənənələri ilə tanış olmaq, yeni dadlar kəşf etmək və ailə, dostlarla unudulmaz bir gün keçirmək üçün gözəl fürsətdir. Bu tədbirin Aİ və Azərbaycan arasında tərəfdaşlığın 30 illiyi çərçivəsində keçirildiyini qeyd etmək xüsusilə qürurvericidir", - səfir bildirib.

Avropa İttifaqının Azərbaycandakı Nümayəndəliyi tərəfindən təşkil olunan festivalda Belçika, Fransa, Almaniya, Polşa, Portuqaliya, Slovakiya, İspaniya, Xorvatiya, Avstriya və Estoniyanın Azərbaycandakı səfirliklərinin nümayəndələri iştirak edirlər.

Festivalın əsas məqsədi Bakı sakinlərini Avropa ölkələrinin milli mətbəxi ilə tanış etməkdir.

Tədbir saat 18:00-dək davam edəcək.

Qeyd edək ki, festival artıq ardıcıl dördüncü ildir Bakıda keçirilir.

Aİ səfiri: Bakıda "Avropanın təamları" festivalı Azərbaycanla tərəfdaşlığın 30 illiyinə həsr olunub

Bu gün Bakıda açılan "Avropanın təamları" (Taste of Europe) adlı Avropa kulinariya festivalı bu il Avropa İttifaqı-Azərbaycan tərəfdaşlığının 30 illiyinə həsr olunub.

"Report xəbər verir ki, bunu Aİ-nin Azərbaycandakı səfiri Mariyana Kuyundciç festivalın açılışında bildirib.

Xəbər yenilənir

Səfir: Kolumbiya və Azərbaycanı mədəni irsə dərin hörmət birləşdirir

Kolumbiya və Azərbaycanı mədəni irsə dərin hörmət birləşdirir.

"Far.Az" xəbər verir ki, bu barədə Kolumbiyanın Azərbaycandakı səfiri Nelsi Rakel Munar Xaramiyo "Tamo sənəti: Azərbaycanda Kolumbiya sənətkarlıq ənənəsi" sərgisinin açılışında bildirib.

"İki ölkəni mədəni irsə dərin hörmət, gözəlliyin əl işləri ilə yaradılması üçün nə qədər vaxt və zəhmət tələb olunduğunu anlamaq və sənətin okeanlarla bir-birindən ayrılan insanları yaxınlaşdıra biləcəyinə dair inam birləşdirir", - diplomat deyib.

O, həmçinin XVI əsrdə Kolumbiyanın cənubunda yaranmış incə sədəfdüzmə texnikası olan tamo sənətinin əhəmiyyətindən danışıb.

Xaramiyonun sözlərinə görə, o dövrdə ustalar məhsul yığımından sonra qalan materiallardan - buğda, arpanın saplaq və samanından istifadə etməyə başlayıblar. Sonradan bu sadə təbii materiallardan flora və faunanın zənginliyi, yerli xalqların simvolları və And dağlarının mənzərələrini əks etdirən unikal əl işləri yaradılmağa başlanıb.

"Bu məmulatlar özündə Narinyo regionunun mədəni irsini daşıyır. Onlar kənd və yerli icmaların mətanətinin, nəsildən-nəslə ötürülən müdrikliyin, eləcə də müstəmləkə dövründən bəri qorunub saxlanılan sənətkarlığın simvoludur", - səfir vurğulayıb.

Qeyd edək ki, "Tamo sənəti: Azərbaycanda Kolumbiya sənətkarlıq ənənəsi" sərgisi oktyabrın 4-dək davam edəcək.

Qarabağ və Şərqi Zəngəzura həsr edilmiş "Sabaha doğru" sənədli filmi təqdim olunub

Qarabağ və Şərqi Zəngəzurda aparılan bərpa-quruculuq işləri və "Böyük Qayıdış" prosesinə həsr olunmuş "Sabaha doğru" sənədli filminin "CineMastercard" kinoteatrında təqdimatı keçirilib.

"Far.Az" xəbər verir ki, film "Azərbaycan Jurnalistlər Şəbəkəsi" İB tərəfindən təqdim olunub.

Filmin ssenari müəllifi Ayaz Mirzəyev bildirib ki, "Şəhərsalma və Arxitektura İli" çərçivəsində hazırlanan filmdə Qarabağ və Şərqi Zəngəzurun bərpası, insanların doğma yurdlarına qayıdışı və burada qurulan yeni həyat insan hekayələri üzərindən təqdim edilir.

Filmdə yerli sakinlərin təəssüratları ilə yanaşı, müasir memarlıq üslubunda salınan və insan yönümlü prinsiplərə əsaslanan yeni yaşayış məntəqələri də nümayiş olunur.

Sənədli filmin çəkilişləri Ağdam, Cəbrayıl, Füzuli, Kəlbəcər, Laçın, Şuşa, Xankəndi, Xocalı və Zəngilanda aparılıb.

Filmin ssenari müəllifi Ayaz Mirzəyev, rejissoru Zəka Qulu, operatoru Emin Hüseynov, montaj üzrə mütəxəssisi isə Elmar Tarıyeloğludur.

"Sabaha doğru" sənədli filmi "Qarabağ və Şərqi Zəngəzurda yenidənqurma və gələcəyin şəhərləri" layihəsi çərçivəsində istehsal olunub. Layihə QHT-lərə Dövlət Dəstəyi Agentliyinin maliyyə dəstəyi ilə həyata keçirilib.

Leyla Əliyeva Müqəddəs Taxt-Tacda Azərbaycan xalçaları sərgisinin açılışında iştirak edib

Sentyabrın 29-da Müqəddəs Taxt-Tacda "Səmavi dinlər" layihəsi çərçivəsində iudaizm, xristianlıq və İslam dinlərinə həsr olunmuş Azərbaycan xalçaları sərgisinin açılış mərasimi keçirilib.

"Report" xəbər verir ki, tədbirdə Heydər Əliyev Fondunun vitse-prezidenti Leyla Əliyeva və Alyona Əliyeva iştirak ediblər.

Açılış məramisində çıxış edən Vatikan şəhər-dövlətinin qubernatorluğunun prezidenti, rahibə Raffaella Petrini mədəniyyətin və yaddaşın sülhün əsas sütunları olduğunu bildirərək deyib: "Sərgi müxtəlif dinlər, xalqlar, mədəniyyətlər, dillər və ənənələr arasında dialoq üçün imkan yaratmaq məqsədi daşıyır. Bu, həm də xalçaçılıq sənətinin köklərinin ölkənin ənənələrinə dərindən bağlı olduğu Azərbaycana bir ehtiramdır. Bu gün burada sərgilənən xalçalar çox bacarıqlı sənətkarlar tərəfindən yaradılmış dəyərli nümunələr olmaqla yanaşı, həm də kimliyin və bəşəriliyin təcəssümüdür".

Rafaella Petrini eksponatların həm də dinlərarası dialoq dəyərinin səfirləri olduğunu diqqətə çatdıraraq, sərginin bu cür danışıqlar üçün konkret imkan yaratmaqla yanaşı, Azərbaycan ilə Vatikan arasındakı əlaqələrin mükəmməl ikitərəfli xarakterinin növbəti təsdiqi olduğunu bildirib.

Azərbaycanın Müqəddəs Taxt-Tacdakı səfiri İlqar Muxtarov ölkəmizin zəngin mədəni irsində xalçanın həmişə Şərqlə Qərbi birləşdirən amil olduğunu deyərək, ölkəmizin əsrlər boyu tarixi İpək Yolunun mühüm tərkib hissəsi olduğunu, regionun ipək istehsalı və xalçaçılıq üzrə əsas mərkəzlərindən birinə çevrildiyini diqqətə çatdırıb.

Bu gün təqdim olunan üç xalçanın bəşəri dəyərlərə həsr olunmuş unikal bədii triptix olduğunu deyən səfir qeyd edib: "Səkkizillik iş prosesində hər üç dinin ənənələrinə tam hörmətlə yanaşılmaqla inanc, dialoq və dözümlülük arasında bədii sintezə nail olunub. Ölkəmizdə Azərbaycan xalqının azad ruhu yalnız dözümlülükdə deyil, həm də ibadət evlərinə və müqəddəs irsə həqiqi hörmətdə özünü göstərir. Bu ruh Azərbaycanda bütün dünyada nümayiş etdirilən dinclik şəraitində birgəyaşayışın özünəməxsus nümunəsini formalaşdırıb. Bu mənada, bu gün təqdim olunan xalçalar son dərəcə dəyərli sənət əsərləridir".

Vatikan Muzeylərinin direktoru xanım Barbara Yatta Romanın həmişə gözəlliyi və ideyaları bölüşmək üçün körpülər saldığını qeyd edərək deyib: "Bu möhtəşəm xalçalar Vatikan Muzeylərinin ən mötəbər bölmələrindən birində - Anima Mundi Muzeyində nümayiş olunur. Bildiyiniz kimi, "Anima Mundi" "dünyanın ruhu" deməkdir və biz son 10 ildə muzeyin bu hissəsini belə adlandırmağa qərar vermişik. Muzeyin bu hissəsi ən xüsusi guşələrdən biridir. Yenidən qurulan bu məkanda dünyanın dörd qitəsi təmsil olunur: Avstraliya, Afrika, Amerika və Asiya. Heydər Əliyev Fondu ilə birlikdə məqsədimiz bunları bir araya gətirməkdir. Hər gün muzeyə gələn minlərlə ziyarətçi müxtəlif mədəniyyətləri və inancları birləşdirən bu əsərləri görmək imkanına malik olur".

Milli Xalça Muzeyinin direktoru Əminə Məlikova bu əsərin Azərbaycanda xalçaçılıq sənətində yeni bir erasının başlanğıcı olduğunu qeyd edib və ilk dəfə olaraq 28 qadının səkkiz il ərzində "Səmavi dinlər" ideyasını həyata keçirdiyini deyib.

Onun sözlərinə görə, Azərbaycan həmişə sülhün və müxtəlif dinlərin nümayəndələrinin birlikdə yaşaya bildikləri məkan olub. "Bizim üçün xalça sənətkarlıqdan, ənənəvi incəsənətdən daha üstün bir dəyərdir. Biz bilirik ki, hər bir ənənəvi incəsənət hansısa xalqın ruhunu nümayiş etdirir. Beləliklə, bu gün bu üç xalçada Azərbaycanın və onun xalqının ruhunu görmək mümkündür", - deyə Ə.Məlikova əlavə edib.

Sonra qonaqlar sərgiyə baxıblar.

Qeyd edək ki, sənət əsəri iudaizm, xristianlıq və İslam dinlərinə həsr edilib, dərin fəlsəfi düşüncənin, milli sənətkarlıq ruhunun təcəssümüdür. Hər üç xalça özündə fərqli dinləri və mədəniyyətləri simvollaşdırır, lakin bir araya gələndə insanlığın ortaq dəyərlərini - sülhü, mərhəməti və ədaləti ifadə edir. Layihə Azərbaycan mədəniyyətinin dərinliyindən gələn universal dəyərlərin, mədəni diplomatiya strategiyasının təcəssümüdür.

Romada "Harmoniya" sənədli filminin təqdimatı olub

İtaliyanın paytaxtı Romada "Harmoniya" sənədli filminin təqdimat mərasimi keçirilib.

"Report" xəbər verir ki, tədbirdə Heydər Əliyev Fondunun vitse-prezidenti Leyla Əliyeva iştirak edib.

Dini Qurumlarla İş üzrə Dövlət Komitəsi, Mənəvi Dəyərlərin Təbliği Fondu və Bakı Media Mərkəzinin birgə tərəfdaşlığı ilə ərsəyə gələn filmin baş prodüseri Bakı Media Mərkəzinin rəhbəri Arzu Əliyevadır.

Mərasimdə Azərbaycan nümayəndə heyəti ilə yanaşı, Müqəddəs Taxt-Tacın dövlət rəsmiləri, diplomatik korpusun və dini icmaların təmsilçiləri, din xadimləri iştirak ediblər.

Tədbirdən əvvəl Azərbaycanın zəngin dini-mədəni irsini və multikultural dəyərlərini təcəssüm etdirən fotostend də nümayiş olunub.

Təqdimatda çıxış edən Azərbaycanın Müqəddəs Taxt-Tacdakı səfiri İlqar Muxtarov filmin ərsəyə gəlməsində əməyi keçən hər kəsə təşəkkürünü bildirərək deyib: "Harmoniya" sənədli filmi bizi müxtəlifliyin dünyagörüşümüzü necə zənginləşdirə və insanları bir-birinə necə yaxınlaşdıra biləcəyi haqqında düşünməyə dəvət edir. Bu gün təqdim olunan film eyni Vətəni - Azərbaycanı paylaşan müxtəlif dini ənənələrə mənsub üç gənc qadının hekayəsindən bəhs edir. Film onların gündəlik həyatı vasitəsilə sadə, lakin dərin bir mesaj ötürür: Dini fərqliliklər insanlar arasında məsafə yaratmamalıdır".

İslamın, xristianlığın və yəhudiliyin ölkəmizdə dərin köklərə malik olduğunu diqqətə çatdıran səfir deyib: "Məscidlər, kilsələr və çoxsaylı sinaqoqlar yalnız bu müxtəlifliyin abidələri deyil. Onlar birgəyaşayışın canlı ənənəsinin bir hissəsidir. Bu tarixi ənənə dini azadlığa hörmət, mədəni və dini irsin qorunması, həmçinin dinlərarası dialoqun dəstəklənməsinə əsaslanan ardıcıl dövlət siyasəti vasitəsilə qorunub saxlanılıb və möhkəmləndirilib".

Müqəddəs Taxt-Tacın Dinlərarası Dialoq üzrə Dikasteriyasının İslam işləri üzrə bürosunun rəhbəri Ata Loran Basanez Müqəddəs Taxt-Tacın Dinlərarası Dialoq üzrə Dikasteriyasının prefekti kardinal Corc Ceykob Kuvakadın müraciətini qonaqlara oxuyub. Müraciətdə kardinal "Harmoniya" sənədli filminin multikulturalizm və qarşılıqlı hörmətlə səciyyələnən kontekst daxilində Azərbaycanda müxtəlif dini ənənələrin nümayəndələri arasında birgəyaşayış təcrübəsini təqdim etdiyini bildirir.

Qeyd olunub ki, filmin elə adı da bizə vacib bir məqamı xatırladır: "harmoniya fərqliliklərimizi silməyi tələb etmir, əksinə, o, bizi bu fərqlilikləri hörmət, dialoq və qardaşlıq ruhunda yaşamağı öyrənməyə səsləyir".

Müraciətdə, həmçinin deyilir: "Dinlərarası dialoq yalnız bəyanatlar və ya rəsmi görüşlər səviyyəsində qala bilməz. O, eyni zamanda, münasibətlərdə, təhsildə, mədəniyyətdə və müxtəlif inanclara mənsub insanların yan-yana yaşamaq tərzində əksini tapır. İncəsənət və kino bu baxımdan xüsusi töhfə verə bilər. Onlar birgəyaşayış haqqında nitqlərdən kənara çıxmağa, dini kimlikləri bir-biri ilə görüşməyə, hörmət etməyə və cəmiyyətə birgə töhfə verməyə mane olmayan insanların üzlərini görməyə, səslərini eşitməyə və konkret təcrübələrini kəşf etməyə imkan yaradır.

Dini Qurumlarla İş üzrə Dövlət Komitəsinin sədri Ramin Məmmədov qeyd edib ki, əsrlər boyu Şərqlə Qərbin qovşağında yerləşən Azərbaycan xalqı multikulturalizm, qarşılıqlı hörmət və dinc yanaşı yaşamaq mədəniyyətini təbii olaraq formalaşdırmış və bunu nəsildən-nəslə ötürmüşdür. O, bu gün Azərbaycanın hər yerində müxtəlif dinlərin və xalqların nümayəndələrinin sülh və əmin-amanlıq şəraitində yaşayıb-yaratdığını bildirib.

Komitə sədri "Harmoniya" sənədli filminin Azərbaycan torpağından bütün bəşəriyyətə göndərilən mühüm mənəvi mesaj olduğunu vurğulayaraq deyib: "Ölkəmizin müxtəlif müqəddəs ziyarətgahlarında və bölgələrində çəkilmiş film müxtəlif dinlərə mənsub üç qadının gündəlik həyatı, ailə dəyərləri və sarsılmaz dostluğu vasitəsilə Azərbaycanın həqiqi reallığını əks etdirir".

Qeyd edək ki, ekran əsəri beynəlxalq festivallarda və müxtəlif kino platformalarında da təqdim olunur.

Sonra "Harmoniya" filmi nümayiş etdirilib.

Faiq Quliyev: Zəlimxan Yaqubun ev-muzeyinin tikintisinə dəstək göstəriləcək

Azərbaycanın Gürcüstandakı fövqəladə və səlahiyyətli səfiri Faiq Quliyev Xalq şairi Zəlimxan Yaqubun Gürcüstanda doğulub boya-başa çatdığı evi ziyarət edib.

"Report"un Gürcüstan bürosu xəbər verir ki, səfir şairin anası ilə görüşüb, onun səhhəti və vəziyyəti ilə maraqlanıb, Zəlimxan Yaqubun həyat və yaradıcılığı ilə bağlı xatirələrini dinləyib.

F. Quliyev, həmçinin Zəlimxan Yaqubun ev-muzeyinin tikintisi ilə bağlı görülən işlərlə yerində tanış olub. Səfir layihənin əhəmiyyətini vurğulayıb və tikinti prosesinə dəstək göstəriləcəyini bildirib.

Qeyd olunub ki, Zəlimxan Yaqubun zəngin ədəbi irsinin, milli-mənəvi dəyərlərə bağlılığının və əziz xatirəsinin gələcək nəsillərə çatdırılması mühüm əhəmiyyət daşıyır.

Adil Kərimli Tacikistanın Baş naziri ilə Milli Xalça Muzeyini ziyarət edib

Azərbaycanın mədəniyyət naziri Adil Kərimli Azərbaycanda səfərdə olan Tacikistanın Baş naziri Koxir Rasulzodanın rəhbərlik etdiyi nümayəndə heyəti ilə birgə Azərbaycan Milli Xalça Muzeyini ziyarət edib.

Bu barədə "Far.Az"a Mədəniyyət Nazirliyindən məlumat verilib.

Bildirilib ki, muzeyin direktoru Əminə Məlikova qonaqlara xalqımızın qədim xalçaçılıq sənəti, onun tarixi, bugünkü inkişaf istiqamətləri, həmçinin muzeyin yaradılması və fəaliyyəti haqqında ətraflı məlumat verib.

O, Azərbaycanın birinci xanımı, Heydər Əliyev Fondunun prezidenti Mehriban Əliyevanın səyləri sayəsində milli xalçaçılıq sənətinin 2010-cu il noyabrın 16-da UNESCO-nun Qeyri-Maddi Mədəni İrs Siyahısına daxil edildiyini vurğulayıb.

Ə. Məlikova ötən ilin sentyabr ayında Milli Xalça Muzeyində Tacikistan Milli Muzeyinin kolleksiyasından tacik tikməsinin nadir nümunələrinin, xüsusən süzənilərin yer aldığı sərginin keçirildiyini söyləyib. Bu cür sərgilərin iki ölkə arasında mədəni dialoqun inkişafına mühüm töhfə vermək məqsədi daşıdığını diqqətə çatdırıb.

Azərbaycanın zəngin milli-mədəni irsi ilə tanışlıq qonaqlarda xoş təəssürat yaradıb.

Xankəndidə müəllim və tələbələrin birgə konserti olub

Xankəndi Mədəniyyət Mərkəzində Qarabağ Universitetinin İncəsənət fakültəsinin müəllim və tələbələrinin iştirakı ilə konsert proqramı təqdim olunub.

Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən "Report"a verilən məlumata görə, tədbirdə Azərbaycan musiqi mədəniyyətinin müxtəlif janrlarını əhatə edən repertuar nümayiş etdirilib.

Bildirilib ki, konsert proqramı Aslan Muradoğlu və saz sinfinin tələbələrinin ifasında "Ovşarı" aşıq havası ilə başlayıb.

Ardınca Teyyub Dəmirovun Aydın Əliyevin işləməsində "Yeni rəqs" əsəri Aydın Əliyev və tələbələrinin ifasında səsləndirilib.

Proqramda həmçinin Adil Bəbirovun "Bənövşə", Hacıbaba Həsənovun "Yağma yağış", "Çahargah" kompozisiyası və "Şur rəngi" təqdim olunub. Konsertin əsas hissələrindən birini xanəndəlik və muğam ifaları təşkil edib.

Tədbirdə Xan Şuşinskinin "Şuşanın dağları" mahnısı Səbinə Ərəbli və tələbələrinin ifasında, Hüseynağa Səmədovun (tar), Xalq artisti Elşən Mansurovun (kamança) və İlqar Süleymanlının (nağara) müşayiəti ilə səsləndirilib.

Proqram çərçivəsində Əməkdar artist Səbuhi İbayev və Səma Soltanovanın ifasında "Segah" təsnifi, Əməkdar artist Ehtiram Hüseynovun tələbələrinin ifasında "Şur" təsnifləri təqdim edilib.

Həmçinin "Qara xal yar" və "Qobustan" ritm kompozisiyaları tamaşaçılara çatdırılıb. Konsert Əməkdar artist Firuz Səxavətin ifasında "Bir sən idin ömrümün bəzəyi" adlı "Şur" təsnifi ilə yekunlaşıb.

"Euronews" Azərbaycan musiqisinə həsr olunmuş süjet yayımlayıb

"Euronews" telekanalı İsveçrənin Montrö-Vevey şəhərlərində təqdim olunan Azərbaycan musiqisinə həsr olunmuş süjet yayımlayıb.

"Report" xəbər verir ki, süjetdə Azərbaycanın zəngin musiqi irsinin İsveçrənin Montrö şəhərində beynəlxalq auditoriyaya təqdim olunmasından bəhs edilir.

Azərbaycan musiqisinin klassik nümunələrindən muğama, operadan caz və milli rəqslərə qədər müxtəlif janrların təqdim olunduğu proqram Montrö-Vevey "Septembre Musical" festivalının 80 illik yubileyi çərçivəsində təşkil edilib.

Tədbirdə Azərbaycanı təxminən 200 sənətçi təmsil edib. Proqramda Dövlət Simfonik Orkestrinin ifasında klassik musiqi nümunələri ilə yanaşı, milli musiqi ənənələrini əks etdirən əsərlər də səsləndirilib.

Süjetdə Azərbaycan professional musiqi məktəbinin banilərindən biri Üzeyir Hacıbəylinin yaradıcılığına da diqqət yetirilib. Onun əsərlərinin festival proqramında səsləndirilməsi Azərbaycanın klassik musiqi irsinin beynəlxalq səviyyədə təqdimatının mühüm hissəsini təşkil edib.

Azərbaycan musiqisinin ayrılmaz hissəsi olan muğam da tədbirin əsas istiqamətlərindən biri olub. Ənənəvi muğam sənəti klassik musiqi, caz, opera və milli rəqs nümunələri ilə birlikdə təqdim olunaraq ölkənin musiqi mədəniyyətinin çoxşaxəli xarakterini nümayiş etdirib.

"Euronews"un süjetində qeyd olunur ki, proqram Azərbaycan musiqisinin həm qədim ənənələrini, həm də müasir inkişaf istiqamətlərini beynəlxalq auditoriyaya çatdırıb. Festival çərçivəsində Azərbaycan musiqisinin müxtəlif janrlarının bir arada təqdim olunması ölkənin zəngin mədəni irsinin nümayişi baxımından diqqət çəkib. Klassik musiqi, muğam, opera, caz və milli rəqslərin vahid proqramda birləşdirilməsi Azərbaycan musiqi mədəniyyətinin rəngarəngliyini ortaya qoyub.

Beləliklə, Montrö-Vevey səhnəsində Azərbaycan musiqisinin təqdimatı ölkənin milli mədəni irsinin beynəlxalq musiqi məkanında nümayiş etdirilməsi baxımından əlamətdar hadisə kimi diqqət çəkib.

"Euronews" Azərbaycan musiqisinə həsr olunmuş süjet yayımlayıb

Azərbaycanlı pianoçu Serbiyada keçirilən konsert proqramında çıxış edib

Serbiyanın Belqrad şəhərində "Gənclər üçün gənclər!" ("Mladi za mlade") adlı ikitərəfli mədəni mübadilə proqramı çərçivəsində təşkil olunan konsert proqramında azərbaycanlı pianoçu Fatimə Əliyeva çıxış edib.

"Far.Az"un Balkan bürosu xəbər verir ki, Belqraddakı İtaliya Mədəniyyət İnstitutunda baş tutan "Duo Jeunesses Musicales" adlı konsert proqramında azərbaycanlı pianoçu ilə bərabər, Şimali Makedoniyadan olan viola ifaçısı Leona Kondratenko da dinləyicilərin qarşısına çıxıb

Konsertin proqramına Robert Şuman, York Boven, Arkancelo Korelli, Culio Kaççini və Manuel de Falyanın əsərləri daxil edilib.

Layihənin məqsədi gənc musiqiçilərin beynəlxalq səhnədə çıxış imkanlarını genişləndirmək, müxtəlif ölkələrdən olan gənc sənətçilər arasında yaradıcılıq əlaqələrini inkişaf etdirmək və mədəni mübadiləni təşviq etməkdir.