Leyla Əliyeva "Azərbaycan təbiətinin izi ilə" sərgisinin açılış mərasimində iştirak edib

Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva "Explore Azerbaijan with IDEA" layihəsi çərçivəsində Dənizkənarı Milli Parkda keçirilən "Azərbaycan təbiətinin izi ilə" adlı sərginin açılış mərasimində iştirak edib.

"Report" xəbər verir ki, sərgidə layihənin fotoqraf və videoqrafı Saleh Baxşiyev tərəfindən Azərbaycanın müxtəlif milli parklarında lentə alınan 30 fauna növünə aid fotoşəkillər nümayiş olunur. Təqdim edilən fauna növlərinin böyük hissəsi Azərbaycanın "Qırmızı Kitabı"na daxil edilib.

Leyla Əliyevanın təşəbbüsü ilə təşkil olunan sərgi IDEA İctimai Birliyi, Dənizkənarı Bulvar İdarəsi və Bakı Zooloji Parkının tərəfdaşlığı ilə keçirilir. Bir ay davam edəcək sərgi çərçivəsində şəhər sakinləri və paytaxtın qonaqları Azərbaycanın zəngin biomüxtəlifliyini əks etdirən fotoşəkillərlə yaxından tanış olmaq imkanı əldə edəcəklər.

Qeyd edək ki, Leyla Əliyevanın təşəbbüsü ilə 2025-ci ildə fəaliyyətə başlayan "Explore Azerbaijan with IDEA" layihəsinin əsas məqsədi Azərbaycanın canlı aləminin təkrarolunmaz gözəlliklərini yerli və beynəlxalq auditoriyaya tanıtmaq, həmçinin ölkəmizin təbiətinin özünəməxsus zənginliyini əks etdirən multimedia bazası formalaşdırmaqdır.

"Explore Azerbaijan with IDEA" təkcə maarifləndirici layihə deyil, həm də təbiətin qorunması və gələcək nəsillərə ötürülməsi üçün çağırışdır.

Azərbaycan təbiətinə məxsus eksklüziv foto və videoməzmunları layihənin rəsmi sosial media səhifələrindən izləmək mümkündür.

"Gazelli Art House"da qadının təbiətlə harmoniyası haqqında "Synchrony" sərgisinin finisajı baş tutub

Bakıda "Gazelli Art House"da ekofeminist nəzəriyyəsinə əsaslanan "Synchrony" sərgisinin finisajı baş tutub.

"Report" xəbər verir ki, ekspozisiya Latviyanın Bakıdakı Səfirliyinin dəstəyi ilə təşkil olunub.

Təqdim edilən əsərlər müasir incəsənətin ifadə imkanları vasitəsilə qadın bədəni ilə təbiət arasındakı harmoniya ideyasını açır. Rəssamlar müxtəlif vizual yanaşmaların köməyi ilə ekoloji problemləri şərh edir, ekofeminist nəzəriyyədə mərkəzi yer tutan "bədən - ekosistem" əlaqəsinə yeni baxış təklif edirlər.

Sərgi təbiətin ritmlərini və insan bədəninin daxili dinamikasını birləşdirərək onların bədii məkanda necə bir-birinə qarışdığını və əks olunduğunu nümayiş etdirir.

Tədbirin açılışında Avropa İttifaqının (Aİ) Bakıdakı səfiri Mariyana Kuyundziç giriş nitqi ilə çıxış edib. O qeyd edib ki, Aİ gender bərabərliyi və ətraf mühitin mühafizəsi məsələlərinə böyük əhəmiyyət verir.

"Biz ekologiya sahəsində çox işləyirik və təbiətin qorunmasına xüsusi diqqət yetiririk. Lakin bu iki mövzunu - qadınları və təbiəti həmişə əlaqələndirmirik. Halbuki rəssamların mesajlarına diqqət yetirmək vacibdir, çünki onlar müəyyən mənada cəmiyyətdə baş verənlərin və ya baş verəcəklərin carçısına çevrilirlər", - diplomat vurğulayıb.

Latviyanın Bakıdakı səfiri Edqars Skuya öz işlərini təqdim edən bütün iştirakçılara təşəkkürünü bildirərək qaldırılan mövzuların - qadınların rolu və təbiətə qayğılı münasibətin əhəmiyyətinə diqqət çəkib.

Qeyd edək ki, "Synchrony" sərgisi dekabrın 6-da başlayıb və fevralın 28-dək davam edəcək.

Biləsuvarda IV Hind quşu Festivalı keçiriləcək

Biləsuvarda IV Hind quşu Festivalı keçiriləcək.

"Report"un Muğan bürosu xəbər verir ki, festival 30 noyabr 2024-cü il saat 10:00-dan başlayacaq.

Tədbir Biləsuvar şəhərindəki Mərkəzi Parkda baş tutacaq.

Artıq dördüncü ildir ki, keçirilən festivalın məqsədi milli mətbəximizin və adət-ənənələrimizin təbliğidir.

Festivalda Salyandan Cəngi qrupu, Masallıdan Nənələr qrupu, saz, şeir deyişmələri, Basqal Arxeoloji Qoruğdan nümayəndə heyəti, ümumilikdə müxtəlif sənətkarlıq nümunələri-dulusçuluq, həsirçilik, rəsm üzrə masterclasslar, maraqlı İlan şousu göstəriləcək. Əlavə olaraq müxtəlif idman oyunları – nərd yarışı, darts yarışı, tiratma, qol güləşi, şahmat vəs təşkil olunacaq.

Heydər Əliyev Mərkəzində məşhur italyan heykəltaraşın sərgisi açılacaq

2024-cü il noyabrın 1-dən 2025-ci il mayın 11-nədək Heydər Əliyev Mərkəzində tanınmış italiyalı monumental heykəltaraş Lorenso Kuinnin (Lorenzo Quinn) sərgisi nümayiş olunacaq.

“Report” xəbər verir ki, sərginin BMT-nin İqlim Dəyişmələri üzrə Çərçivə Konvensiyasının Tərəflər Konfransının Bakıda keçiriləcək 29-cu sessiyası (COP29) ərəfəsində təşkil olunması təsadüfi deyil. Belə ki, “Təbiətdə tarazlıq” (Equilibrium in Nature) ekspozisiyası ictimaiyyətin diqqətini bir daha ekoloji məsələlərə yönəldəcək. Bakı sərgisinin konsepsiyasının əsasını ətraf mühitin dərk olunması, təbiətə qayğı ilə yanaşma, təbiətin gücü və bu gücün tükənməzliyinin təsviri ideyası təşkil edir.

L.Kuinnin əsərləri Heydər Əliyev Mərkəzinin parkında və foyesində təqdim olunacaq. Bakı sərgisində ziyarətçilər “Eros”, “Birlikdə” (Together), “Paralel dünya” (Pharalel Universe), “Təbiətin gücü” (Force of Nature), “Özünü sev” (Love Yourself), “Balanslaşdırılmış dünya” (Balanced World) və digər əsərlər ilə tanış ola biləcək.

Eksponatlar arasındakı “Tanrının əli” (Hand of God) heykəltaraşlıq nümunəsi müəllifin şedevrlərindən hesab olunur. Bu əsərdə bükülmüş çılpaq adam yorğun halda qollarını aşağı salaraq, onu dəstəkləyən nəhəng bir ovucun içərisində oturur. Lorenso bu əsərini oğluna həsr edib. “Tanrının əli” ziyarətçilərin diqqətini uşaqların real həyatda üzləşdiyi təhlükələrə cəlb edir. Bu əl sonradan Kuinnin digər monumental işlərində mərkəzi elementə çevrilib. Həmin əl sevgi, nifrət, yaratmaq hissi və məhv etmək gücünü təsvir edir.

Lorensonun Bakıya gətirilən digər işi isə “Birlikdə” (Together) adlanır. Məhz bu kompozisiyanın Gizada nümayişi ilə ilk dəfə müasir incəsənətin piramidaya yaxın olmasına icazə verilmişdi. Sözügedən monumental kompozisiya 2021-ci ildə Kann şəhərində, 2023-cü ildə isə Dubayda sənətsevərlərə təqdim olunub. İndi isə əsər 6 ay ərzində Bakı sərgisində Heydər Əliyev Mərkəzinin parkında yer alacaq. Əsərdə insana yaratmağa, həm də məhv etməyə imkan verən vasitə olan əllər təsvir edilib. Bununla rəssam hər şeyin öz əlimizdə olduğuna inanır.

Bakı sərgisini bəzəyən digər əsər “Təbiətin gücü” (Force of Nature) olacaq. Əsər kövrək, lakin çox güclü qadın obrazını təcəssüm etdirir. Burada ana təbiətin özü canlandırılır.

Heydər Əliyev Mərkəzinin parkında dünya sənətsevərlərini heyran edən Lorenso Kuinnin “Bəxş et və al” (Give and Take) əsərini də izləmək mümkün olacaq. Həmin əsərlə heykəltaraş diqqəti həyatda, o cümlədən təbiətdə tarazlığın önəminə yönəldir.

Oskar mükafatına layiq görülmüş aktyor Entoni Kuinn və geyim dizayneri, aktrisa İolanda Addolorinin ailəsində doğulan Lorenso Nyu-Yorkda İncəsənət Akademiyasında təhsil alıb. Rəssam olmağı planlaşdırsa da, enerjisini və orijinal ideyalarını daha yaxşı ifadə etmək üçün taleyini heykəltaraşlıqla bağlamaq qərarına gəlir. Lorenso Kuinn aktyor kimi də tanınaraq filmlərdə rol alıb.

“Hisslərin yaradıcısı”, “emosiyaların rəssamı” kimi tanınan Lorenso son dövrlərdə ən çox tələb olunan heykəltaraşlardan biridir. Lorenso Kuinnin əsərləri dünyaya sülh, harmoniya, “yaratmaq və ya məhv etmək yalnız öz seçimimizdən asılıdır” kimi ismarıcları çatdırır. Əsərləri insan təbiətinin müsbət və mənfi cəhətlərinin tarazlığını nümayiş etdirir.

Sabah Sabirabadda əmək yarmarkası keçiriləcək

Oktyabrın 10-da Sabirabadda Dövlət Məşğulluq Agentliyi tərəfindən əmək yarmarkası keçiriləcək.

“Report”un Aran bürosunun məlumatına görə, yarmarkada işsiz və işaxtaran şəxslərə 150-dən çox vakansıya təqdim ediləcək.

Yarmarka Sabirabad şəhəri, İlham İsgəndərov küçəsi 8-də yerləşən rayon Mədəniyyət Mərkəzində baş tutacaq.

Naxçıvanda sərgi-satış yarmarkası keçiriləcək

Naxçıvanda oktyabrın 10-dan 17-dək sərgi-satış yarmarkası keçiriləcək.

"Report"un yerli bürosu xəbər verir ki, sabahdan başlayaraq Naxçıvan şəhərindəki Heydər Əliyev Sarayında Naxçıvan Muxtar Respublikasının 100 illiyi ilə əlaqədar məhdud fiziki imkanlı və istedadlı qadınların rəsm və əl işlərindən ibarət sərgi-satış yarmarkası start götürəcək.

Sərgi-satış yarmarkasının keçirilməsində məqsəd xalqımızın ailə dəyərlərinin qorunub saxlanılması, adət-ənənələrinin yaşadılması, milli və xalq tətbiqi sənət nümunələrinin təbliğ edilməsi, həmçinin qadınların özünüməşğulluqlarının təmin edilməsi və istedadlarının üzə çıxarılmasıdır.

Bakıda RAK İncəsənət Fondunun rəssamlarının əsərlərinin sərgisi açılıb

Bu gün Bakıda “QGallery”də Bəhreyndə fəaliyyət göstərən RAK İncəsənət Fondunun rəssamlarının əsərlərinin sərgisi açılıb.

“Report” xəbər verir ki, RAK İncəsənət Fondunun təsisçisi, görkəmli bəhreynli rəssam və kolleksiyaçı, Heydər Əliyev Mərkəzində bir neçə dəfə sərgisi keçirilən Raşid Al Xəlifədir.

Sərginin açılışında çıxış edən Raşid Al Xəlifə deyib ki, bəhreynli rəssamların tükənməz istedadını Azərbaycandakı sənətsevərlərlə bölüşmək fürsətinə malik olduğumdan xeyli məmnundur:

"Belə bir səmərəli əməkdaşlıq şübhəsiz ki, Azərbaycan və Bəhreyn arasında ümumbəşəri sənət dili vasitəsilə qarşılıqlı anlaşma və dəyərləndirməyə vasitə olmaqla, uğurlu mədəni mübadilələr silsiləsinin başlanğıcıdır”.

O qeyd edib ki, RAK İncəsənət Fondu beynəlxalq tərəfdaşlıq və anlaşmanı təşviq edir.

“Bu fond mədəniyyətlərarası əməkdaşlıq və mübadilələri asanlaşdırmaq məqsədi ilə Bəhreyn sənətini qlobal miqyasda təbliğ etməyə sadiqdir. O, incəsənət vasitəsilə innovasiya, davamlılıq və müsbət dəyişikliyi müdafiə edərək tənqidi müzakirələrə və sosial dialoqa töhfə vermək qətiyyətindədir", - Raşid Al Xalifa deyib.

O vurğulayıb ki, belə bir əməkdaşlığın məqsədi Bəhreynli sənətkarların zəngin qobelenlərini Bakının canlı və rəngarəng incəsənət səhnəsinə təqdim etməkdən ibarətdir:

“Bu isə, incəsənət həvəskarları və kolleksiyaçılara Bəhreyn müasir incəsənətinin gözəlliyinə və əsərlərdəki fəlsəfi yanaşmalar aləminə baş vurmaq və o məqamlarda yaşamaq üçün unikal bir imkan deməkdir”.

"Azərxalça" ASC-nin sədri Emin Məmmədov öz növbəsində deyib ki, rəssam Raşid Al Xəlifə və RAK İncəsənət Fondu ilə əməkdaşlıq incəsənətin beynəlxalq dostluq və mədəni anlaşmanın daha geniş təşəkkül tapmasına bariz bir sübutdur:

"Biz, Bəhreyn müasir incəsənəti və hörmətli rəssam Raşid Al Xəlifə ilə mənalı görüşlərdən sonra bu nəcib amalın təşviqinin qaçılmaz olduğu qənaətinə gəldik və Bəhreynin müasir incəsənət nümunələrinin ümumi mənzərəsinin Bakıda canlandırılacağından məmnuniyyət hissi keçiririk. İnanıram ki, bu ölkələrimiz arasında gələcək mübadilə və tərəfdaşlıq imkanlarının daha geniş vüsət alacağı ilə nəticələnəcək".

Gələn ay Şamaxıda keçiriləcək Üzüm və Şərab Festivalının şou proqramı açıqlanıb

Sentyabrın 7-8-də Şamaxıda keçiriləcək növbəti Üzüm və Şərab Festivalının şou proqramı açıqlanıb.

"Report"un məlumatına görə, Meysəri kəndində “Şirvan şərabları” MMC-nin üzümçülük və şərabçılıq kompleksinin ərazisində təşkil olunacaq tədbirdə Azərbaycandan və digər ölkələrdən bir sıra sevilən sənətkarlar, qruplar çıxış edəcək.

Festivalda Azərbaycanın Xalq artisti Aygün Kazımova, Azad Şabanov, Kubadan dəvət olunan müğənni və rəqqasə Edqlis Hayle, Elvin Mirzəzadə, “Good Girls” qrupu, Gürcüstanın məşhur qruplarından "Niko’s Band", "MadTeen&Rəssam", "Roman&Nirvana Band", Şəhriyar İmanov və Teymur Süleymanbəyli dueti, Dj Amalov çıxış edəcəklər. Eyni zamanda tədbirdə Braziliya karnaval, həmçinin Libertanqo rəqslərinin nümayişi olacaq.

İki gün ərzində saat 14:00-dan 21:00-dək davam edəcək festivalın ərazisi dequstasiya, əyləncə, yemək, suvenir satışı, master-klasslar, o cümlədən şərabla rəsm master-klassı, açıq havada film nümayişi kimi müxtəlif interaktiv zonalara bölünəcək.