Oktyabrda səyyar "ASAN xidmət"in fəaliyyət göstərəcəyi ünvanlar açıqlanıb

Oktyabrın 1-29-da Beyləqanda, Siyəzəndə, İsmayıllıda, Yevlaxda, Lökbatanda və Xırdalanda, 1-7-də Cəbrayılda, 1-14-də Samuxda və Lerikdə, 12-29-də Füzulidə, 16-29-də Göygöldə və Yardımlıda vətəndaşlara səyyar xidmət göstəriləcək.

Bu barədə "Far.Az"a Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyindən məlumat verilib.

Bildirilib ki, səyyar ASAN xidmət avtobusları həftə içi 5 gün saat 10:00-dan 17:00-dək fəaliyyət göstərir.

Cəbrayıl, Füzuli, Lerik, Beyləqan və Yardımlıda fəaliyyət göstərən Səyyar ASAN xidmət avtobuslarında isə iş qrafiki saat 11:00- dan 17:00-dək nəzərdə tutulub.

Bu ilin 8 ayında əlilliyi olan 9 min şəxsə 376 min reabilitasiya vasitəsi verilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyi bu ilin yanvar-avqust aylarında əlilliyi olan 9 min şəxsi 376 min reabilitasiya vasitəsi ilə təmin edib.

Bu barədə "Far.Az"a nazirlikdən məlumat verilib.

Bildirilib ki, qeyd olunan reabilitasiya vasitələrindən 1599-u təkərli oturacaq (o cümlədən 27-si mühərrikli təkərli oturacaq), 1230-u aşağı və yuxarı ətraf protezi, 1896-sı əsa, qoltuqaltı və dirsəkaltı ağac olub.

Həmçinin əlilliyi olan şəxslərə 5385 cüt protez və ortopedik ayaqqabı, 1413 eşitmə aparatı, 152 korset və s. reabilitasiya vasitələri təqdim olunub.

Reabilitasiya vasitələrini almaq üçün özlərinin və ya yaxınlarının Bakıya, Agentliyin Protez-Ortopedik İstehsalat və Reabilitasiya Mərkəzinə gəlmək imkanı olmayan əlilliyi olan şəxslərə bu vasitələr evlərinə aparılaraq təqdim olunub.

Ukraynadan daha 30 uşaq reabilitasiya xidmətlərinə cəlb olunmaları üçün Azərbaycana gətirilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin təşkilatçılığı ilə Ukraynadan daha 30 uşaq sosial-psixoloji reabilitasiya xidmətləri ilə təmin edilmək üçün Azərbaycana gətirilib.

"Report" xəbər verir ki, uşaqlar Agentliyin tabeliyində olan Qəbələ Uşaq Reabilitasiya Mərkəzində 10 günlük proqram çərçivəsində tibbi, eləcə də sosial-psixoloji reabilitasiya xidmətləri ilə təmin olunacaqlar.

Proqram çərçivəsində onlar üçün fərdi psixoloji konsultasiyalar, qrup terapiyaları, yoqa və rəqs terapiyası məşğələləri keçiriləcək. Habelə uşaqlar müalicəvi masaj, müalicəvi hovuz və vanna, art-terapiya və digər reabilitasiya xidmətlərindən yararlanacaqlar.

Onların Şəki, Şamaxı şəhərlərindəki tarixi yerlərə, muzeylərə ekskursiyalarının təşkili də nəzərdə tutulub.

Sosial Xidmətlər Agentliyi tərəfindən ötən dövrdə Ukraynadan 500-dək uşaq və gənc Azərbaycana gətirilərək sosial-psixoloji reabilitasiya xidmətləri ilə təmin olunub.

Yanvar-avqust aylarında 32 440 uşağa reabilitasiya xidmətləri göstərilib

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin reabilitasiya müəssisələrində bu ilin yanvar-avqust aylarında 32 440 uşağa xidmətlər göstərilib.

"Report" xəbər verir ki, bu barədə Əmək və Əhalinin Sosial Müdafiəsi Nazirliyindən məlumat verilib.

Bildirilib ki, onlardan əlilliyi olan 1541 uşaq stasionar, 19 560 uşaq ambulator, digərləri icma əsaslı, onlayn, səyyar reabilitasiya xidmətlərinə cəlb olunub.

Bu kateqoriyaya aid uşaqlar Agentliyin Bakıda yerləşən 1 və 2 saylı Uşaq Reabilitasiya Mərkəzlərində, Qəbələ və Şəmkir rayonlarındakı Uşaq Reabilitasiya Mərkəzlərində reabilitasiya xidmətləri ilə təmin edilirlər.

Milli Observatoriyanın "SosialLab" müsabiqəsinin ilk görüşü keçirilib

Əmək və Əhalinin Sosial Müdafiəsi Nazirliyinin tabeliyində fəaliyyət göstərən Əmək Bazarı və Sosial Müdafiə Məsələləri üzrə Milli Observatoriyanın yeni "SosialLab" elmi-analitik müsabiqəsinin ilk mərhələsi üzrə görüş baş tutub.

"Report" xəbər verir ki, görüşdə ali təhsil və tədqiqat müəssisələrinin nümayəndələrinə layihənin mahiyyəti, müsabiqənin şərtləri və qiymətləndirmə meyarları təqdim olunub.

Milli Observatoriyanın İdarə Heyəti sədrinin müavini Elçin Süleymanov komandalar üçün effektiv təhlil və tədqiqat metodları üzrə təlim keçib, hesabatların hazırlanması qaydaları və metodoloji yanaşmalar izah edilib.

Bildirilib ki, müsabiqə çərçivəsində təqdim olunacaq hesabatlar texniki uyğunluq və plagiat yoxlamasından sonra beynəlxalq akademik meyarlarla qiymətləndiriləcək.

Qalib komandaların məqalələrinin Scopus indeksli jurnallarda dərc olunması üçün akademik redaktə və çap dəstəyi göstəriləcək.

Gənclərin tədqiqat bacarıqlarını inkişaf etdirmək məqsədilə təşkil edilən və iki ay davam edəcək SosialLab müsabiqəsində 11 ali təhsil və tədqiqat müəssisəsi iştirak edir.

Daha bir qrup ukraynalı uşaq bu gün Azərbaycana gətiriləcək

Ukraynadakı müharibə ilə əlaqədar zərər çəkən növbəti qrup ukraynalı uşaq sentyabrın 28-də Azərbaycana gətiriləcək.

"Far.Az" xəbər verir ki, qarşılama saat 17:00-da olacaq.

Uşaqlar düşərgələrə yerləşdiriləcək.

Qeyd edək ki, ötən dövrdə Sosial Xidmətlər Agentliyi tərəfindən Ukraynadan 450-yə yaxın uşaq və gənc Azərbaycana gətirilərək sosial-psixoloji reabilitasiya xidmətləri ilə təmin edilib.

Yevlaxda şəhid ailələri və müharibə ilə əlaqədar əlilliyi olan şəxslərə 50 mənzil verilib

Yevlax şəhərində yerləşən MİDA Yaşayış Kompleksində Əmək və Əhalinin Sosial Müdafiəsi Nazirliyi tərəfindən şəhid ailələri və müharibə ilə əlaqədar əlilliyi olan şəxslərə daha 50 mənzil verilib.

"Report"un Qarabağ Bürosunun xəbərinə görə, mənzillərin sənədlərinin təqdim edilməsi tədbirində Nazirliyin tabeliyində Sosial Xidmətlər Agentliyinin İdarə Heyətinin sədri Vüqar Behbudov və Yevlax şəhər icra hakimiyyətinin başçısı iştirak ediblər.

Bildirilib ki, Prezident, Müzəffər Ali Baş Komandan cənab İlham Əliyevin rəhbərliyi ilə Azərbaycan Ordusunun Vətən müharibəsində qazandığı tarixi Zəfərdən sonra şəhid ailələri və müharibə ilə əlaqədar əlilliyi olan şəxslərin mənzillə təminatı proqramı 5 dəfə genişləndirilib.

Bu gün təqdim edilən mənzillər də daxil olmaqla postmüharibə dövründə qeyd edilən kateqoriyalara aid şəxslərə 7350 - dən, ümumilikdə ötən dövrdə 16 mindən çox mənzil verilib.

Şəhid ailələri və müharibə ilə əlaqədar əlilliyi olan şəxslərin mənzil-məişət şəraitinin yaxşılaşdırılması tədbirləri ilə yanaşı, onların digər istiqamətlərdə də sosial dəstək tədbirləri ilə əhatə olunduqları diqqətə çatdırılıb.

Yeni mənzillərlə təmin olunan şəhid ailələri və müharibə ilə əlaqədar əlilliyi olan şəxslər göstərilən yüksək diqqət və qayğıya görə Prezident cənab İlham Əliyevə dərin minnətdarlıqlarını bildiriblər.

Cəbrayıl sakini: Dövlət biznesimizi inkişaf etdirmək üçün bizə yetərli dəstək verib

Azərbaycan dövləti Cəbrayıla qayıdan sahibkarlara bizneslərini inkişaf etdirmək üçün yetərli dəstək verib.

"Far.Az"un Cəbrayıla ezam olunan əməkdaşı xəbər verir, ki, bunu Dövlət Məşğulluq Agentliyinin dəstəyi ilə biznes fəaliyyətini genişləndirən yerli sahibkar Bayram Əliyev deyib.

"Mən Cəbrayıla köçdkdən sonra öz sahəm üzrə əmək fəaliyyərimi davam etdirmək üçün Dövlət Məşğulluq Agentliyinə müraciət etdim. Qısa müddət ərzində avtomobil təkərlərinin təmiri üçün müasir təkərçıxarma, balansyoxlama, hava kompressoru və əlavə avadanlıqlarla təmin olunmuşuq. Əvvəllər primitiv üsulla gördüyümüz işləri artıq müasir avadanlıqlarla icra edirik. Bu da işimizi daha sürətli və rahat görməyə imkan verir".

Özünəməşğulluq proqramından yaralanan digər sahibkar İlham Həmidov isə öz biznes fəaliyyətini ət satışı sahəsi üzrə davam etdirdiyini söyləyib:

Hər iki sahibkar gələcəkdə öz işlərini daha da genişləndirmək niyyətində olduqlarını bildirblər.

Cəbrayılda 2147 nəfər məşğulluq tədbirlərinə cəlb olunub

Cəbrayıl rayonuna köçürülmüş sakinlərdən 2147 nəfər məşğulluq tədbirlərinə cəlb edilib.

"Far.Az"un Cəbrayıla ezam olunmuş əməkdaşı xəbər verir ki, bu barədə Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən rayona təşkil edilmiş mediatur çərçivəsində bildirilib.

Qeyd olunub ki, proqram çərçivəsində verilmiş aktivlər hesabına rayon sakinləri Ətrabə Mirkişiyeva üçün un məmulatlarının istehsalı, Elburus Cəfərli üçün kişi bərbərxanası, İlham Həmidov üçün qəssab dükanı, Bayram Əliyev üçün isə avtomobil şinlərinin bərpası və təmiri xidmətləri zərfləri üzrə kiçik ailə təsərrüfatları qurulub.

Məlumat verilib ki, Cəbrayıl rayonuna köçürülmüş sakinlərdən 2147 nəfər məşğulluq tədbirlərinə cəlb olunub. Onlardan 93 nəfər üçün özünüməşğulluq proqramı çərçivəsində kiçik ailə təsərrüfatları yaradılıb.

Bildirilib ki, bu günə qədər işğaldan azad edilmiş ərazilərdə keçirilən tədbirlər çərçivəsində 12 minə yaxın şəxsin məşğulluğu təmin olunub. Onlardan 1051 nəfər üçün özünüməşğulluq proqramı çərçivəsində kiçik ailə təsərrüfatları qurulub.

"John Deere"in yeni nəsil pambıqyığan kombaynları təqdim olunub

"John Deere"in Azərbaycandakı yeganə rəsmi dileri olan "Agromotors Azərbaycan" şirkətinin təşkilatçılığı ilə Azərbaycan Dövlət Aqrar Universitetində (ADAU) "John Deere" brendinin yeni nəsil pambıqyığan kombaynlarının təqdimat mərasimi keçirilib.

Tədbirdə aidiyyəti dövlət qurumlarının rəhbər vəzifəli şəxsləri, "John Deere"in geniş tərkibli nümayəndə heyəti, pambıqçılıq sahəsində fəaliyyət göstərən özəl şirkətlərin nümayəndələri, fermerlər, eləcə də universitetin professor-müəllim heyəti və tələbələri iştirak ediblər.

Tədbirin açılışında çıxış edən "Agromotors Azərbaycan" şirkətinin direktoru Sərxan Əliyev şirkətin fəaliyyəti, "John Deere" ilə Azərbaycan dövləti arasında aparılan yüksəksəviyyəli danışıqlar, mövcud və perspektiv tərəfdaşlıq imkanları, həmçinin "John Deere"in Azərbaycanın təhsil müəssisələri ilə əməkdaşlıq təşəbbüsləri barədə məlumat verib.

Kənd təsərrüfatı nazirinin müavini Seymur Səfərli çıxışında ölkənin aqrar sektorunda həyata keçirilən texniki və texnoloji yenilənmələrdən, Dövlət Proqramında müəyyən edilmiş hədəflərdən danışıb. O, istehsalın səmərəliliyinin artırılması və rəqabətqabiliyyətli aqrar sektorun formalaşdırılması istiqamətində dövlətimizin həyata keçirdiyi tədbirlər barədə məlumat verib.

"John Deere Walldorf" şirkətinin vitse-prezidenti Peter Zakse John Deere ilə Azərbaycan arasındakı əməkdaşlığın tarixindən və şirkətin qlobal kənd təsərrüfatının inkişafına verdiyi töhfələrdən bəhs edib. O, həmçinin "John Deere"in müasir texnologiyaları, rəqəmsallaşma imkanları və dəqiq əkinçilik həlləri haqqında danışıb.

ADAU-nun rektoru Zəfər Qurbanov çıxışında müasir kənd təsərrüfatının tələblərinə cavab verən yüksək ixtisaslı kadrların hazırlanmasının, elmi-tədqiqat fəaliyyətinin istehsalatla əlaqələndirilməsinin və innovativ yanaşmaların tədris prosesinə inteqrasiyasının universitetin əsas prioritetləri sırasında olduğunu bildirib.

Daha sonra iştirakçılar "John Deere CP570" pambıqyığan kombaynına əyani baxış keçirərək texnikanın quruluşu və əsas funksiyaları ilə tanış olublar. Şirkətin nümayəndələri kombaynın texniki xüsusiyyətləri, iş prinsipi, üstünlükləri və tətbiq imkanları barədə ətraflı məlumat veriblər.

Tədbirin sonunda ADAU ilə "Agromotors Azərbaycan" arasında təhsil sahəsində əməkdaşlıq, tələbələrin praktiki hazırlığının gücləndirilməsi, müasir kənd təsərrüfatı texnologiyalarının tədris prosesinə inteqrasiyası və gələcək əməkdaşlığın perspektivləri ətrafında fikir mübadiləsi aparılıb.

"John Deere"in yeni nəsil pambıqyığan kombaynları təqdim olunub

Azərbaycanda sentyabr ayının pensiya ödənişləri yekunlaşıb

Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu tərəfindən respublika üzrə sentyabr ayının pensiya ödənişləri yekunlaşdırılıb.

"Report" xəbər verir ki, bu barədə nazirlik məlumat yayıb.

Bildirilib ki, sentyabrın 8-də Naxçıvan Muxtar Respublikası, sentyabrın 11-də Bakı, Sumqayıt şəhərləri və Abşeron rayonu, bu gün isə Azərbaycanın bölgələrində qeydiyyatda olan şəxslərin sentyabr ayı üzrə pensiyaları, habelə güzəştli şərtlərlə təyin edilmiş pensiyalar ödənilib.

Xankəndi, Xocalı, Xocavənd, Ağdərədə 3 867 sakin məşğulluq tədbirlərinə cəlb edilib

Xankəndi, Xocalı, Xocavənd və Ağdərəyə köçürülmüş sakinlərdən 3 867 şəxs məşğulluq tədbirlərinə cəlb edilib.

Bu barədə "Far.Az"a Əmək və Əhalinin Sosial Müdafiəsi Nazirliyindən bildirilib.

Qeyd olunub ki, onlardan 3 723-nün məşğulluğu təmin olunub, o cümlədən, 560 şəxs üçün özünüməşğulluq proqramı çərçivəsində kiçik təsərrüfatlar yaradılıb.

Sakinlərdən 144 şəxs isə peşə hazırlığına cəlb edilib.

Hazırda Xankəndi, Xocalı, Xocavənd və Ağdərədə daha 660-dək şəxsin məşğulluğunun təmin edilməsi istiqamətində işlər aparılır.