Talassemiyalı uşaqlar üçün toplanmış bir milyon manata yaxın vəsaiti dələduzluq yolu ilə ələ keçirməkdə təqsirləndirilən şirkət sahibi Nuridə Seyidova və digər iki nəfər – Aynur Bayramova və Aysel Məmmədovanın cinayət işi üzrə məhkəmə prosesi keçirilib.

"Far.Az" xəbər verir ki, Bakı Ağır Cinayətlər Məhkəməsinin hakimi Azad Məcidovun sədrliyi ilə keçirilən prosesdə müttəhim Aynur Bayramova ifadə verib.

O bildirib ki, xəstələr pulu onun yanında Nuridə Seyidovaya verib:

"Zərərçəkən Kəmalə Nuriyevanı Talassemiya Mərkəzindən tanıyıram. O, pulu mənim yanımda Nuridəyə verib. Digər zərərçəkən Nüşabə Məmmədovadan 34 min manat alınıb".

A.Bayramova ifadəsində qeyd edib ki, zərərçəkənlər Taleh Hacıməmmədov 34 min, Ramin İsmayılov 25 min 500, Elnur İsfəndiyarov 25 min, Vüqar İsayev 30 min, Laura Həsənova isə 51 min manat manat pulu onun yanında Nuridə Seyidovaya veriblər.

Cinayət işi üzrə zərərçəkmiş Şahbacı İsayeva ifadəsində deyib ki, Aynur Bayramovaya Talassemiya Mərkəzində otaq ayrılıb:

"Aynur Bayramova kim idi ki, mərkəzdə ona ayrıca otaq ayırmışdılar. Bu şəraiti ona Talassemiya Mərkəzində baş həkim vəzifəsində işləyən Xuraman xanım yaratmışdı".

A.Bayramova zərərçəkən Ş.İsayevanın sualına cavab olaraq bildirib ki, o "Antalya Medical Park"ın əməkdaşı olub. Ona görə də mərkəzdə ona xəstə qəbulu üçün şərait yaradıblar.

Hakim Azad Məcidov deyib ki, Talassemiya Mərkəzinə bununla bağlı sorğu göndərilib, lakin Aynur Bayramovanı tanımadıqlarını deyiblər.

"Aynur sən beş il ərzində Türkiyəyə qan aparmısan, heç soruşan olmayıbmı, niyə və hara aparırsan?", - deyə hakim xanım müttəhimə sualında bildirib.

Müttəhim A.Bayramova cavabında Talassemiya Mərkəzində baş həkim vəzifəsində işləyən Xuraman adlı xanımın icazəsi olduğunu deyib.

Məhkəmənin növbəti iclası oktyabrın 9-na təyin olunub.

Qeyd edək ki, talassemiyalı xəstələrin valideynlərinin Daxili İşlər Nazirliyinə müraciətindən sonra faktla bağlı cinayət işi başlanılıb. İstintaqla müəyyən edilib ki, Nuridə Seyidova digərləri ilə əlbir olaraq 36 nəfər talassemiya xəstəsinin valideynlərinin etibarından sui-istifadə edərək həmin şəxslərin övladlarını Türkiyədə müalicə etdirmək adı ilə 1 milyon manata yaxın dələduzluq edib.

Xanım müttəhimlərə qarşı Cinayət Məcəlləsinin 178.4-cü ( dələduzluq-xüsusilə külli miqdarda ziyan vurmaqla törədildikdə) maddəsi ilə ittiham irəli sürülüb.

Oxşar xəbərlər

Prezident İlham Əliyev Qarabağ Universitetinin təmirdən sonra açılışında iştirak edib - YENİLƏNİB-4

İlham Əliyev V “ADEX-2024” və “Securex Caspian” sərgiləri ilə tanış olub - YENİLƏNİB-2

Vətən müharibəsi çağırışçılarının əmək haqqını sabiq idarə rəisi “yeyib”? - MN-də 143 milyonluq mənimsəmə ilə bağlı məhkəmə

MN-dəki 143 milyonluq cinayət işi: General Namiq Poladova 4 milyon 600 min manat çatıb

Bir milyon manatdan çox dələduzluqla əlaqədar məhkəmədə bəraət alan şəxslə bağlı protest verilib