Dövlət qurumlarından birinin Lənkəran rayonunda yerləşən regional mərkəzinin rəhbəri öz işçisindən xüsusi ittiham qaydasında məhkəməyə şikayət edib.

"Qafqazinfo" xəbər verir ki, məmur şikayətində rəhbərlik etdiyi qurumun əməkdaşı Asif Ramazanovun (ad və soyadlar şərtidir - red.) Cinayət Məcəlləsinin 147 və 148-ci (Böhtan və təhqir) maddələrinə əsasən cəzalandırılmasını tələb edib.

Vəzifəli şəxs öz işçisinin onun barəsində "WhatsApp"da təhqiramiz ifadələr işlətdiyini, fotosunu ədəbsiz formada montaj edərək "… müəllim anqırır", "kiss my … … müəllim" kimi ifadələr yazdığını bildirib.

Şikayətçi bildirib ki, Asiflə münasibətləri 2023-cü ilin dekabr ayınadək normal olub: "Asif əvvəllər baş mühəndis işləyib, sonradan hansısa problemi olduğu üçün aşağı vəzifəyə keçirilib. Daha sonra gecə saat 23:30-da qurumun Bakıdakı rəhbər şəxsinin telefonuna "WhatsApp"la səs atdığı üçün ona iradımı bildirdim. Belə ki, xidmət rəisi mənimlə əlaqə saxlayaraq həmin hadisəyə görə mənə iradını bildirdi, mən də öz növbəmdə Asifi çağıraraq ona irad tutdum. Bundan sonra Asifi "WhatsApp"da əngəllədim. Bu səbəbdən mənim barəmdə etdiyi əvvəlki paylaşımları görməmişəm. Amma əvvəllər də telefonu vasitəsilə bu tip paylaşımlar edib. Sonra G.Kərimova adlı işçi mənə dedi ki, "utanırıq, Asifin qarşısını alın, o, barənizdə pis şeylər, görüntülər paylaşır". Cavabımda bunlardan məlumatsız olduğumu bildirdim".

Mərkəz rəhbəri qeyd edib ki, məsələ ciddiləşəndən sonra Asifin atası idarəyə gələrək üzrxahlıq etmək istəyib: "Lakin mən onu qəbul etmədim, düşündüm ki, oğulun etdiyi hərəkətə görə atası üzr istəməməlidir. Bundan sonra bir neçə dəfə xəbər göndərdi ki, onu bağışlayım".

Araşdırmalar zamanı məlum olub ki, həmin paylaşımlardan sonra Asif Ramazanov işdən çıxarılıb. O, ifadəsində müdirinin fotolarını paylaşdığını etiraf edib, lakin şəkillərin üstündəki yazıların özü tərəfindən yazılmadığını, onu cəzalandırmaq üçün təşkil edildiyini deyib.

Lənkəran Rayon Məhkəməsi Asif Ramazanovun təhqir maddəsi üzrə cəzalandırılmasına hökm edib və ona 1000 manat cərimə kəsilib.

Oxşar xəbərlər

İlham Əliyevin tapşırığına uyğun olaraq FHN-in amfibiya tipli təyyarəsi Türkiyəyə yola salınıb - VİDEO

Bakıda tuneldə qəza: TIR-la "Prius" toqquşub - VİDEO

Sevda Sanaliyevanı təqib edən şəxs polisə çağırıldı - VİDEO/YENİLƏNİB

Müğənni Sevda Sanaliyeva izləndiyi ilə bağlı görüntülər yaydı: "Qapımda manyak yatır" - VİDEO

Paşinyanın Ermənistana töhfəsi - işsizlik pik həddə çatıb - ŞƏRH