Almaniya Federal Hesablama Palatası ordunun yeni döyüş helikopterləri ilə təchizatı layihəsinin icrasında yol verilən nöqsanlara görə ölkənin Müdafiə Nazirliyini kəskin tənqid edib.

"Report" xəbər verir ki, bu barədə "Der Spiegel" jurnalı Bundestaq (Almaniya parlamenti) üçün hazırlanmış məxfi hesabata istinadən məlumat yayıb.

Sənəddə bildirilir ki, 2023-cü ildə Bundesver üçün sifariş edilmiş yeni yüngül döyüş helikopterləri planlaşdırılandan xeyli gec döyüş qabiliyyətinə malik olacaq.

Hesablama Palatasının qiymətləndirməsinə görə, layihənin icrası "kritik mərhələdədir". Bununla belə, qrafikdən geri qalmaq əsas problem hesab edilmir. Sursatların sertifikatlaşdırılması ilə bağlı çətinliklər səbəbindən ordu yaxın perspektivdə yalnız uça bilən, lakin atəş aça bilməyən helikopterlər əldə edə bilər.

Jurnalın yazdığına görə, bu vəziyyət Berlinin NATO qarşısında götürdüyü öhdəlikləri yerinə yetirməsini də təhlükə altına qoyur. Belə ki, Almaniya 2029-cu ilədək alyansa 12, 2032-ci ildən etibarən isə 72 döyüş qabiliyyətli yüngül helikopter təqdim etməyi planlaşdırır.

Nəşr hesab edir ki, belə bir ssenarinin reallaşması Almaniya hökuməti üçün ciddi problemə çevrilə bilər.

Oxşar xəbərlər

Lökbatandakı yanğına helikopterlər indiyədək 200 ton su töküb - YENİLƏNİB-4

Lökbatandakı yanğına helikopterlər indiyədək 150 ton su töküb - YENİLƏNİB-4

Mehriban Əliyeva Vatikanda Müqəddəs Komodilya katakombalarının bərpası layihəsinin açılışında iştirak edib

Azərbaycanın ilk beynəlxalq kardiologiya jurnalı – Journal of Heart Disease and Therapy – 3-cü nömrəsini təqdim edilib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2