"Problem yoxdur" sənədli filmi Sumqayıtda təqdim edilib.

“Report”un yerli bürosu xəbər verir ki, rejissor Elçin Ağazadənin ekranlaşdırdığı “Problem yoxdur" sənədli filmi növbəti dəfə beynəlxalq təlimçi Əsmər Kərimovanın təşkilatçılığı ilə Sumqayıt şəhərində Muğam Mərkəzində nümayiş edilib.

Əlilliyi olan şəxs Alik Cəfərovun həyat hekayəsindən bəhs edən filmin ilk təqdimat tədbiri Bakıda daha sonra Gəncə şəhərində iştirakçılar tərəfindən böyük coşqu ilə qarşılanıb.

Sumqayıt şəhərində də Azərbaycan Dövlət Himni ilə başlayan tədbirdə pedaqoq Aygün Qasımova və "Azərbaycan Əlil Velosipedçilərə Dəstək" İctimai Birliyinin sədri, Milli Paralimpiya Komitəsinin nəzdində paravelosiped idman növü üzrə milli komandanın baş məşqçisi Amid Həsənquliyevin aparıcılığı ilə təşkil olunan təqdimat mərasimində ekran əsərinin özəlliyindən söhbət açılıb. Onlar bu filmin və bu tədbirlərin inklüziv cəmiyyətin inkişafı üçün böyük əhəmiyyət daşıdığını bildiriblər.

Tədbirin təşkilatçısı Əsmər Kərimova tədbiri açıq elan etdikdən sonra çıxış üçün söz inklüziv təhsil mütəxəssisi, pedaqoq Zivər Xanlarovaya və təhsil eksperti İlhamə Axundovaya verilib. Natiqlər çıxışlarında təhsildə və cəmiyyətdə inklüzivliyin inkişafı üçün 2018-2024-cü illər ərzində Dövlət Proqramının təsdiq edilməsini diqqətə çatdırıb.

Bildirilib ki, bu ali dəyərləri yaşatmaq üçün hər sahədə hər bir vətəndaşın üzərinə düşən vəzifələr var.

Sonra əlilliyi olan Fərid Abışovun tarda ifası tədbirə xüsusi rəng qatıb.

Tədbirdə filmin çəkilməsində böyük dəstəyi olan “Mənəvi Dünya” İctimai Birliyinin sədri mərhum Hacı Şahin Həsənlinin xatirəsi yad edilib və videoçarx göstərilib. Sonra film nümayiş olunub.

Filmin nümayişindən sonra yazıçı psixoloq İlqar Kamil çıxışında rejissora təşəkkür edərək bu filmin əsl terapiya olduğunu deyib xoş təəssüratını bölüşüb.

Sonda rejissor Elçin Ağazadə ekran əsərinin yaranmasından və bu işdə əməyi keçən digər insanlardan danışıb.

Göygöl rayonunun Balçılı kəndində yaşayan filmin baş qəhrəmanı Alik Cəfərovun video müraciəti və təşəkkürü alqışlarla yekunlaşıb.

Oxşar xəbərlər

Fərid Qayıbov: Avqust ayı Azərbaycan idman tarixinə yeni qələbələr, tarixi uğurlar və rekordlarla yazıldı

Mehriban Əliyevanın doğum günüdür

Fərid Qayıbov İdman-Konsert Kompleksindəki idman bölmələrinə baxış keçirib

Daşkənddə Azərbaycan və Özbəkistan prezidentlərinin işgüzar dairələrin nümayəndələri ilə görüşü keçirilib - YENİLƏNİB - 2

Mehriban Əliyeva - Azərbaycan humanizminin simvolu - FOTO