Enerji sektoru Azərbaycan və Ekvador arasında əməkdaşlığın inkişafı üçün perspektiv istiqamətlərdən biridir.

"Report" xəbər verir ki, bunu Azərbaycanın xarici işlər nazirinin müavini Elnur Məmmədov Ekvador agentliyi "Expreso"ya müsahibəsində bildirib.

O əlavə edib ki, bu məsələ cari ilin may ayının əvvəlində onun Ekvadora işgüzar səfəri zamanı müzakirə olunub.

"Biz Azərbaycanın Dövlət Neft Şirkəti SOCAR ilə Petroecuador arasında mümkün əməkdaşlığı müzakirə etdik. Hesab edirik ki, bununla tərəflər yüksək səviyyəli bir sıra birgə layihələri işləyə biləcəklər", - nazir müavini deyib.

Onun sözlərinə görə, ilk növbədə tərəflər investisiyaların qarşılıqlı qorunmasına yönəlmiş investisiya sazişinin bağlanması üzrə danışıqların aparılması imkanını nəzərdən keçiriblər.

"Nəzərə alsaq ki, söhbət genişmiqyaslı makroiqtisadi qərarlardan gedir, coğrafi uzaqlıq olduqca böyükdür, bu cür bazarlar müəyyən adaptasiya dövrü tələb edir. Bu baxımdan biz İkitərəfli İnvestisiya Müqaviləsi üzrə danışıqların başlaması imkanını nəzərdən keçirdik, çünki kapitalların tam hüquqlu fəaliyyəti üçün hüquqi qorunmaya ehtiyacı var. Enerji sahəsi, qeyd etdiyim kimi, əməkdaşlıq üçün son dərəcə perspektiv olaraq müəyyən etdiyimiz istiqamətlərdən biridir", - E. Məmmədov bildirib.

O əlavə edib ki, Azərbaycan bərpa olunan enerji mənbələrinin inkişafı sahəsində də təcrübəsini Ekvadorla bölüşməyə hazırdır.

"Bizdə günəş və külək elektrik stansiyalarının tikintisi üçün genişmiqyaslı layihələr həyata keçirilir və böyük investisiyalar yatırılır, siz isə, bildiyim qədər, əsasən su elektrik stansiyalarına diqqət yetirirsiniz. Biz bu bilikləri və ən yaxşı təcrübələri sizinlə bölüşmək istəyirik", - E. Məmmədov deyib.

O əlavə edib ki, "yaşıl enerji" qlobal səviyyədə qazıntı yanacağından imtinanın zəruriliyini nəzərə alaraq təkcə Ekvador yox, həm də Azərbaycan üçün mühüm mövzudur .

"Bu, gündəliyimizdə mütləq prioritetdir. Biz COP29-a ev sahibliyi etdik, çünki qlobal iqlim dəyişikliyi ilə mübarizədə dünya liderlərindən biri olmaq istəyirdik", - nazir müavini vurğulayıb.

Oxşar xəbərlər

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Xankəndidə İqtisadi Əməkdaşlıq Təşkilatının 17-ci Zirvə görüşü keçirilib, İlham Əliyev çıxış edib